Rueda, sobre a idea de trasladar o plan de Ence nas Pontes a Lourizán: "É só a petición dun sindicato"

O presidente da Xunta de Galicia valorou exausitvamente o significado do pronunciamiento do Tribunal Supremo con respecto a Ence e as consecuencias xurídicas que pode ter para os intereses da Xunta.

Preguntado por Galiciapress sobre a posibilidade de que o proxecto da fábrica de fibra e papel tisú de Ence nas Pontes cambie agora de dirección rumbo a Lourizán unha vez asegurada a continuidade da factoría na ría, Alfonso Rueda rebaixou esa opción a que se trata tan só da reclamación dun sindicato.

Con todo, apelou a ser especialmente exixentes con Ence, que agora ten que cumprir "os compromisos aparellados a esa prórroga": "Imos estar moi vixiantes". 

O fallo do Tribunal Supremo permitindo a continuidade de Ence nas marismas de Lourizán até 2073 provocou un carrusel de reaccións que promete seguir suceder no tempo. Mentres os traballadores celebran a decisión do alto tribunal, as asociacións ecoloxistas e outras administracións públicas como o Concello de Pontevedra esperan a coñecer o texto da sentenza para poder emprender as próximas accións legais en prol de cambiar o ditame do Supremo. Entre medias, os traballadores de Ence en Pontevedra buscan volver á normalidade e recuperar o tempo perdido nunha planta sobre a que fai moito que non se realizan os investimentos necesarios. 

É neste punto no que saíu onte Comisións Obreiras a defender que a factoría pontevedresa precisa máis que un lavado de face e que os traballadores deberían verse recompensados cos grandes proxectos que ten en mente a pasteira para a comunidade. Nesa liña, Aleia Pérez, secretaria xeral de CC.OO. en Galicia, avoga por que a compañía leve a Lourizán o proxecto da fábrica de fibra e papel tisú que pretenden construír nas Pontes. 

Para o orgaismo sindical supón a cristalización de “unha reivindicación histórica”: completar o ciclo produtivo da firma en Lourizán. Ao tempo, inciden na urxencia de pór en marcha o plan estratéxico con investimentos que permanecía paralizado até coñecer o xuízo do Supremo. 

“ENCE TEN QUE CUMPRIR Os seus COMPROMISOS”

Tras a reunión do Consello da Xunta, e consultado por Galiciapress , o presidente do Goberno de Galicia, Alfonso Rueda , pronunciouse sobre a suxestión de Comisións Obreiras, que pillou a moitos co pé cambiado cando algúns actores políticos tratan de pasar páxina canto antes ao redor da polémica de Lourizán. 
 

“Ence agora ten que cumprir varios compromisos potentes que ían aparellados á prórroga concedida no seu día. Agora ten que cumprir en investimentos, en compromisos medioambientais, no plan social suspendido desde hai tempo… Agora todo iso hai que exigirselo”, aclarou Rueda.
 

Rueda lembrou que o pronunciamiento do Supremo dá validez á continuidade de Ence en Pontevedra, pero que está sometido a unha serie de condicións. “O que agora se recoñeceu, para que teña validez, ten unha serie de condicionantes ao redor duns compromisos de Ence sobre os que estaremos absolutamente vixiantes”, valorou o mandatario. 

“Varios deles teñen que ver con investimentos que está a realizar a Xunta de Galicia e que Ence ten que facer unha achega económica”, apostilou o presidente autonómico, en referencia ás instalacións de depuración que se están realizando en Lourizán “e sobre as que Ence comprometeu unha serie de investimentos”.
 

“E para poder facer todas esas ampliacións suspendidas á espera da decisión do Supremo necesita dunha serie de cumprimentos e requisitos medioambientais estritos respecto dos cales imos estar moi vixiantes”, avanzou. 

PODE HABER CAMBIOS NAS PONTES?

Con respecto á reclamación feita desde Comisións Obreiras, Rueda rebaixouno a unha simple “petición dun sindicato”. A continuación, supeditou o pronunciamiento da Xunta a coñecer mellor os plans da compañía, que se faga pública a folla de ruta de Ence para “pechar o seu ciclo fabril”, aspectos que o presidente di descoñecer e sobre os que non se prefire pronunciar. 

Con todo, a posición en Ence con respecto aos seus plans industriais nas Pontes non parece que vaia cambiar a pesar do seu triunfo no Supremo. En primeiro lugar, porque o proxecto das Pontes foi celebrado e anunciado aos catro ventos por todas as administracións públicas, que consideraron o anuncio como unha das fórmulas para reanimar a unha zona industrilamente deprimida como a comarca do Eume. 

Por outra banda, hai que contar con que a fábrica de papel tisú necesita dunha infraestrutura e unhas características para as que o emprazamento de Lourizán talvez non sexa o lugar máis axeitado, xa que os recursos necesarios ou a loxística exposta para As Pontes poden descartar que ese proxecto teña sitio na ría de Pontevedra. 
 

LEI DE ORDENACIÓN DO LITORAL

As consideracións de Rueda foron posteriores ao anuncio de que o Consello da Xunta tratara en profundidade o escenario que agora se abre para a economía galega ao contar con Ence de novo no taboleiro. Sen poder cuantificar o impacto económico, unha valoración que virá “nos próximos días”, a análise do Consello versou sobre “repercusión desde o punto de vista xurídico” nos plans da Xunta referidos á futura Lei de Ordenación do Litoral. 

O texto polo que batallan en San Caetano, presentando un recurso ante o Supremo polo Regulamento Xeral de Costas aprobado polo Goberno de España o pasado verán, busca dotar de máis seguridade xurídica a empresas como Ence, cun longo percorrido en Galicia “creando riqueza e actividade económica vinculada á costa”. 

Nese primeiro achegamento, entenden os servizos xurídicos da Xunta que o fallo do Supremo “avalará a posición da Xunta sobre as prórrogas das concesións do dominio público marítimo-terrestre”. “Entendemos que este fallo reforza a tese da Xunta. O dereito das concesións a ser renovadas queda avalado, polo que o equilibrio entre a conservación do litoral e manter actividades craves para a economía galega é posible”, gabia, o que supón á súa vez unha lombeirada para a Lei de Ordenación do Litoral.