Vídeo: O Dépor naufraga ante a Real Sociedade B en Riazor (0-3)

O idilio de Riazor co seu equipo crebouse da forma máis xélida posible. Nunha noite marcada polo frío e unha preocupante desconexión futbolística, o Deportivo caeu con estrépito ante a Real Sociedade B (0-3), encaixando o seu segundo correctivo consecutivo en casa en apenas sete días. O que debía ser o asalto definitivo ao ascenso directo converteuse nunha crise de identidade que deixa ao técnico, Antonio Hidalgo, no centro de todas as miradas.

Un inicio de "autoestradas" e falta de puntaría

O partido arrincou cun Dépor preguizoso, lastrado por imprecisións que contaxiaron a unha bancada xa de seu mermada polos polémicos horarios da competición. Pese ao ritmo lento, a banda esquerda foi un oasis: Quagliata e Yeremay atoparon unha autoestrada ante a adiantada liña defensiva donostiarra.

A historia puido ser distinta si no minuto 7, tras un pase maxistral de Quagliata, Yeremay non cruzase en exceso o seu remate a porta buxán despois de regatear á meta Fraga. Foi o primeiro aviso dunha noite de "quero e non podo". O filial realista, que até hoxe non sabía o que era puntuar lonxe de Zubieta, aguantou o ballón inicial e empezou a estirar, obrigando a Arnau a empregar a fondo para frear a Ochieng.

O esborralle defensivo

 O 0-1 chegou tras un erro encadeado: un mal pase atrás de Patiño e a pasividade de Quagliata permitiron a Astiazaran filtrar un balón para que Carreira definise con sangue frío.

Tras o descanso, Hidalgo buscou a reacción dando entrada a Zakaria . O neerlandés e Mella tiveron ocasións para igualar, topar cun Fraga que demostrou por que é internacional sub-21. Con todo, cando o Dépor máis empuxaba, chegou o mazazo definitivo. Un erro na entrega de José Ángel propiciou que Balda avanzase sen oposición e, desde trinta metros, limpase as telarañas da escuadra de Germán cun mísil imparable. Co 0-2, o equipo baixou os brazos e Gorosabel pechou a conta pouco despois, certificando un 0-3 que desatou a música de vento nas bancadas.

Da ambición ao conformismo

Máis aló do resultado, o que escuece na Coruña é o cambio de discurso. Antonio Hidalgo, que chegou ao club cunha franqueza refrescante apuntando ao "top 6", tentou suavizar o trompazo en sala de prensa: "Estamos dentro do obxectivo". Pero Riazor non comulga con rodas de muíño. A pitada xeneralizada ao final do encontro e a imaxe de afeccionados abandonando o estadio antes do asubío final reflicten un divorcio latente.

O Dépor confírmase como un equipo incapaz de remontar: das sete veces que empezou perdendo este curso, en catro acabou derrotado. A "regresión á media" parece alcanzar a un bloque que en novembro voaba e agora móstrase extremadamente vulnerable.

Un fin de ano baixo sospeita

Sen tempo para lamentacións, o calendario ofrece unha "oportunidade" que hoxe parece máis un compromiso incómodo que un premio. O martes visita Riazor o Mallorca en Copa do Rei. O que debería ser unha festa polo regreso dun Primeira perfílase como un plebiscito para Hidalgo e a directiva.

A marea branquiazul non esixirá eliminar a un rival de superior categoría, pero tras recibir seis goles en dous partidos en casa, non tolerará outra caída sen alma. O 2025, que prometía pechar con brinde de ascenso, encamíñase cara ao turrón entre a resignación e a desconfianza.