O Teatro da Música da Cidade da Cultura queda en formigón e almacén

Para levalo a cabo non será necesario un edificio novo, senón que se aproveitará a existencia dunha estrutura de formigón en desuso, erguida para o que ía ser o Teatro da Música, edificio incluído no proxecto orixinal do Gaiás e finalmente non construído.

Dada a localización desas novas instalacións no lateral do Xardín do Teatro anexo á Biblioteca, optarase por unha solución arquitectónica que favoreza a súa integración no espazo verde onde se atopan, eliminando o impacto visual que xera agora este muro.

Cunha superficie de 1.000 metros cadrados, permitirá conservar obras de arte e fondos bibliográficos, así como almacenar estruturas e outro tipo de elementos técnicos empregados na montaxe das mostras ou nas producións escénicas.

A actuación responde o incremento da actividade do Museo e da Biblioteca e Arquivo, así como á ampliación de liñas de traballo da Cidade da Cultura, que nos últimos anos comezou a producir exposicións e outros contidos non só para ser exhibidos no Gaiás, senón para itinerar por toda a Comunidade e centros de fóra de Galicia.

A Fundación Cidade da Cultura licitará estes traballos nos próximos días por un importe de 1,3 millóns de euros (máis IVE) e cun prazo de execución de 18 meses.

"Non é un edificio novo, é para o depósito de estruturas", insistiron para explicar que o obxectivo é situar elementos que son necesarios para proxectos expositivos sen descartar tamén albergar outros fondos como obras. Todo iso ante o incremento de actividade e o aumento de propostas expositivas.

A Cidade da Cultura foi unha actuación que, desde o seu inicio, non estivo exenta de críticas, entre outras cuestións porque se terminase sen completar ao construír catro edificios e quedar noutras dúas paradas as obras. Desta forma, o proxecto do arquitecto Eisenman quedou incompleto.