Lucía Freitas será a pregoeira nas vodas de ouro da Festa do Queixo de Arzúa
A reputada cociñeira compostelá será a gran protagonista do pregón no 50 aniversario da gran cita gastronómica.
O queixo é un dos produtos máis utilizados nas cociñas de todo o mundo. Xa sexa en salsa, en po, para gratinar ou nunha cuña, é un elemento capaz de cambiarlle a cara a calquera creación. Sábeno ben na Tafona e Lume, os restaurantes onde a cociñeira Lucía Freitas conquista padais en cada servizo. A compostelá coñece de primeira man o poder deste lácteo e na súa neveira non falta nunca unha boa roda de queixo de Denominación de Orixe Protexida Arzúa-Ulloa, sendo o municipio coruñés capital do queixo e onde a chef será a encargada de dar o pregón na 50 Edición da Festa do Queixo.
PREGÓN, SHOWCOOKING E MÚSICA
Así o anunciou a organización deste gran evento cultural e gastronómico, considerando a Freitas "unha das grandes embaixadoras da gastronomía galega" cunha cociña que "combina vangarda e tradición", pero tamén considerando a súa "aposta firme polos produtos locais e o talento feminino".
"Ademais de ser unha cociñeira de referencia, é investigadora, activista e impulsora de 'Amas dá Terra', un proxecto que visibiliza o papel das mulleres na gastronomía", apuntan desde a Festa do Queixo, que convida a todos a acudir o sábado 16 de marzo, ás 12 horas, ao pregón que dirixirá Freitas.
Non será, por outra banda, a única actividade coa cociñeira de protagonista. Co delantal e o gorro posto, Freitas porase á fronte dos fogóns nun showcooking exclusivo, cun aforamento linmitado a medio centenar de persoas, ás 13:45 horas no Recinto Feiral 'Terra do Queixo' onde se darán cita todos os produtores nas decenas de expositores que participarán nesta nova edición da Festa do Queixo
O showcooking será unha das moitas actividades dun día que completará o Festival do Queixo co seu primeiro día de concertos, coas actuacións de Xoel López, The Rapants, Cariño, Mondra e Capital Voskov, gañadores do Queixo Maquetón.
Xa o domingo será a quenda de Xisco Feijóo, Vos Melidaos e Son de Arzúa, que porán a nota musical a clausúraa destas vodas de ouro cheas de sabor e ritmo.
Escribe o teu comentario