Villano Antillano e Hijos da Ruína, grandes atraccións do Festival Río Verbena de Pontevedra

O festival, programado para o 24 de setembro, promete ser a última gran festa do verán máis festivalero de Galicia.

Ademais da participación do grupo conformado por Natos e Waor xunto a Recycled J hai outras confirmacións como Sila Lúa, pero tamén haberá "sorpresitas".

O próximo 24 de setembro, no Parque de Tafisa, Pontevedra despedirá o verán co Festival Río Verbena, unha nova cita musical que este venres presentou un avance do seu cartel que inclúe a Villano Antillano, Sila Lúa, Hijos da Ruína, Thom Archi e Dj Groove Amigos e "máis sorpresitas".

Así o adiantou Marta González, propietaria de Maldita Sede, empresa organizadora do festival en colaboración con Industrias Esmerarte, o Concello de Pontevedra e a Xunta de Galicia.

As entradas poñeranse á venda o 17 de agosto a un prezo de saída de 19 euros e poderanse adquirir nas páxinas web ataquilla.com e rioverbena.com

UNHA IDEA QUE VÉN DE LONXE

"A idea de organizar un festival así naceu hai anos por parte de varios hostaleiros da cidade, logo cruzámonos con Esmerarte para levar adiante o proxecto e contamos ademais co apoio do Concello", explicou a promotora, sobre como frutificou este festival "sostible e totalmente respectuoso co medio ambiente".

Tanto desde Maldita Sede como por parte do Concello e a Xunta coincidiron ao sinalar que Pontevedra non podía quedar fose do circuíto de festivais de Galicia. E o nicho que atoparon para esta primeira edición do Río Verbena Fest é o da música urbana. "Leva o nome de verbena porque os estilos irán variando, esta vez pensamos na música urbana para a xeración nova", salientou Marta González.

Sobre o cartel de Río Verbena Fest, destacou que o grupo Hijos da Ruína, un referente da música urbana, ofrecerá en Pontevedra o último concerto deste proxecto formado por Natos e Waor xunto a Recycled J. Tamén destaca Villano Antillano, que saltou á fama neste 2022 tras o lanzamento da súa colaboración co produtor arxentino Bizarrap nunha das súas xa míticas Bzrp Music Sessions.

Outras das confirmacións son a artista galega Sila Lua, o artista local Thom Archi e a parella de DJ André Vázquez e Pau DAfonso (Groove Amigos).

ALTO VALOR PATRIMONIAL E TURÍSTICO

Desde a Xunta destacaron que, en pleno Xacobeo, o festival, únese aos concertos do Camiño recoñecendo así o alto valor patrimonial e turístico que sempre xerou o roteiro xacobeo á cidade do Lérez.

"Galicia é un referente en canto a música e festivais, e as Rías Baixas son o epicentro, pero a capital non podía non ter un oco nese circuíto de festivais vinculados á cultura e a música, e á actividade económica", apuntaron desde o Concello de Pontevedra.

Ademais, lembraron que nos días previos a Río Verbena celebrarase o 'Ferve Estrela Galicia', un evento cultural de cervexa, cociña e música que terá lugar na Alameda de Pontevedra nos días 16, 17 e 18 de setembro.