Colisión en cadea con once feridos na Autovía do Barbanza, en Rianxo

O número de feridos na colisión en cadea con 11 vehículos implicados, entre eles un autobús, ocorrido na Autovía do Barbanza, á altura de Rianxo, deixou finalmente a nove persoas feridas, segundo informou o 112 Galicia.

O dispositivo obrigou a pechar a estrada en sentido Ribeira no quilómetro 10, aínda que neste momento xa está aberto un carril de circulación.

Segundo informou previamente o 112 Galicia, o accidente ocorreu na AG-11 pouco despois das 19.30 horas da tarde deste venres, cando un particular informaba dunha colisión entre varios coches no quilómetro 14 da citada vía, á altura da parroquia rianxeira de Isorna.

Nun primeiro momento, o alertador explicaba que inicialmente se tratou dunha colisión entre tres vehículos, e que a continuación chocaran en cadea os restantes.

Aínda que inicialmente se informou de que había 14 vehículos implicados, a Garda Civil de Tráfico confirmou tras a súa intervención que eran un total de 11. Entre eles, un autobús de pasaxeiros no que todos os ocupantes resultaron ilesos.

No operativo participaron Urxencias Sanitarias de Galicia-061, os bombeiros de Boiro e de Ribeira, a Garda Civil de Tráfico, a Policía Local, os voluntarios de Protección Civil de Rianxo e os servizos de mantemento da autovía.