Accidente mortal no Gran Sol a bordo do 'Novo Alborada', onde xa houbo outros dous mortos

 Un fatal accidente laboral rexistrado este xoves en augas do Gran Sol saldouse co falecemento dun tripulante e graves feridas para outro mariñeiro do arrastreiro con base en Vigo, tiñendo novamente de negro a actividade pesqueira da comunidade.

A desgraza golpeou á embarcación cando faenaba a unhas trinta millas ao suroeste da illa de Valentia, fronte ás costas do condado de Kerry. Segundo as primeiras informacións difundidas pola radiotelevisión pública irlandesa (RTÉ) e confirmadas por fontes oficiais, o suceso desencadeouse pola rotura repentina dun cabo ou estacha, cuxo lategazo alcanzou de cheo a dous dos traballadores que se atopaban operando en cuberta nese momento.

Como consecuencia do violento impacto, un mariñeiro de nacionalidade marroquí perdeu a vida no propio buque, sen que os compañeiros puidesen facer nada por reanimalo. O outro afectado, un operario orixinario de Indonesia, sufriu politraumatismos severos que fixeron necesaria unha evacuación médica de máxima urxencia para tentar salvarlle a vida, tal e como xestionaron desde Salvamento Marítimo en coordinación con Dublín.

Un rescate ao límite

A voz de alarma deuse ao redor das 10:00 horas na península a través do Centro Radio Médico. Desde Madrid contactouse inmediatamente co Centro de Coordinación de Rescates de Valentia para solicitar asistencia internacional, activando un dispositivo de emerxencia que mobilizou medios aéreos e marítimos nunha carreira contra o reloxo e os elementos.

As tarefas de auxilio non foron sinxelas debido á hostilidade do océano Atlántico nesa zona. Os servizos de emerxencia irlandeses describiron as condicións meteorolóxicas como un desafío extremo, enfrontar a unha forte ondada con mar de fondo que levantou paredes de auga de até seis metros de altura, dificultando enormemente a aproximación e maniobrabilidad dos dous helicópteros e o avión de á fixa despregados na zona.

A pesar da bravura do mar, os equipos de rescate lograron izar ao ferido a bordo dunha das aeronaves. O tripulante foi trasladado ao Hospital Universitario de Cork, onde ingresou pasadas as dúas da tarde para ser tratado das súas lesións, mentres que o corpo do falecido permaneceu baixo custodia no arrastreiro galego á espera da súa repatriación.

Outro accidente mortal a bordo

O 'Novo Alborada', un buque de casco de aceiro con porto basee en Vigo e case 39 metros de eslora, é un veterano destas augas construído a principios da década dos 2000. O barco partira apenas dous días antes, o martes, desde o porto irlandés de Castletownbere para iniciar a súa marea, unha rutina laboral que se viu truncada por este novo sinistro mortal, o segundo a bordo na última década.

Segundo no informe da Comisión Permanente de Investiación de Accidentes e Incidentes Marítimos,  no 'Novo Alborada' ocorreu o 24 de xuño de 2018 houbo un accidente mortal a bordo, mentres o buque se atopaba atracado no porto irlandés de Castletownbere. A traxedia desencadeouse durante unha manobra de mantemento, cando a tripulación tentaba trasladar as pesadas portas de arrastre desde a popa cara á cuberta para a súa reparación.

Debido a unha execución inadecuada e ao uso de maquinaria que non soportou a tensión, produciuse un fallo que golpeou violentamente a un mariñeiro de 51 anos natural de Serra Leona. Aínda que o tripulante foi evacuado de urxencia en helicóptero ao Hospital Universitario de Cork con graves feridas abdominais, faleceu tres días despois, revelando a investigación posterior deficiencias na supervisión e nas medidas de seguridade durante a operación.

En 2023, houbo outro accidente, cun home que caeu á auga. Cando o recuperaron, estaba xa falecido, segundo relatou Salvamento Marítimo.

Segundo a Organización Marítima Internacional, o dono do barco actualmente é Jose Cesareo SL, situada no Porto de Vigo.