Finxen un accidente de tráfico para cobrar do seguro do seu Porsche Carreira e agora poden acabar en prisión

A sección segunda da Audiencia Provincial da Coruña acollerá o mércores, día 26, o xuízo contra dous homes acusados de finxir un accidente de tráfico para cobrar unha indemnización do seguro. Fiscalía pide para cada un deles 2 anos e 11 meses de prisión, ademais dunha multa.

En concreto, segundo o escrito de acusación, os feitos remóntanse a abril do 2019, cando un dos acusados alugou unha furgoneta nunha empresa de aluguer de coches. O outro procesado comprara meses antes, por 19.400 euros, un Porsche Carreira en Róterdan.

Postos de común acordo, e con ánimo de obter un enriquecemento ilícito, colocaron o 12 de abril de 2019 os coches encaixados nunha rotonda da estrada FE-13, en Ferrol, para "aparentar que chocaran accidentalmente", tras causar "considerables danos" no Porsche.

Ambos asinaron un parte @amistoso de accidente para que un deles puidese reclamar diñeiro á aseguradora. O outro devolveu ao cabo dos días a furgoneta á empresa, aparentemente sen danos, e deu parte do accidente.

Polas lesións sufridas, un dos procesados recibiu unha compensación de algo máis de 3.100 euros. Con todo, dado que reclamaba 24.000 euros polos danos no coche, a entidade aseguradora negouse ao abono e foi necesaria a apertura dun proceso xudicial.

No marco deste proceso púidose determinar que os danos que presentaban os vehículos non eran compatibles coa descrición da colisión e, por tanto, que fora simulada.

Fiscalía considera aos dous acusados culpables dun delito de estafa e outro de estafa en grao de tentativa, polos que pide para eles dous anos e 11 meses de prisión, así como o pago de 1.200 euros de multa e a devolución dos 3.193 euros cobrados.