Morre afogado nunha praia de Vigo un mergullador
O home tiña sesenta e cinco anos e sospéitase que puido sufrir algunha indisposición mentres estaba a mergullar neste areal de Oia no que hai zonas rochosas con bastante vida subacuática.
Un mergullador faleceu este xoves na praia viguesa da Sobreira, na parroquia de San Miguel de Oia, segundo confirmaron fontes do CIAE 112 Galicia.
A alerta saltou sobre as 13,00 horas, cando un particular chamou a Emerxencias para advertir de que había unha persoa flotando no mar fronte á praia, que parecía afogada.
No transcurso da chamada, o propio informante sinalaba que se estaba sacando o corpo do mar cara á beira do areal e que se trataba dunha persoa ataviada con traxe de mergullador. De inmediato, o 112 alertou a Urxencias Sanitarias de Galicia-061, a Policía Nacional e Policía Local, Salvamento Marítimo, Gardacostas e Protección Civil.
O 061 mobilizou o seu helicóptero con base en Santiago pero, á súa chegada, os profesionais sanitarios nada puideron facer pola vítima.
Escribe o teu comentario