A alcaldesa de Santiago enviará á Xunta o informe sobre a taxa turística "nos próximos días"

A alcaldesa de Santiago, Goretti Sanmartín, insistiu este sábado en que quere trasladarlle en persoa ao presidente da Xunta, Alfonso Rueda, o informe sobre a taxa turística na capital galega e que, se non a recibe, enviarallo "nos próximos días".

"Pero a nosa intención é trasladalo de maneira directa", manifestou en declaracións este sábado tras participar no recibimento a máis de 60 nenos pacientes oncolóxicos que realizaron o Camiño de Santiago. Un acto no que tamén estivo presente o titular do Goberno galego.

Sanmartín reiterou que o Concello ten preparado ese informe, que prefire darlle a Rueda de "maneira directa" porque cre que "é un tema moi importante". "Se non nos recibe, mandarémosllo nos próximos días, pero a nosa intención era trasladarllo de maneira directa", insistiu.

Ademais, cuestionada sobre a postura de Alfonso Rueda sobre a taxa turística, a rexedora compostelá ha sinalado que queda "coas veces que o presidente" lle comunicou que "estaba en disposición de mirar o informe da taxa turística" e que "el non o vía de maneira negativa".

"Non lle vai a quedar máis remedio, porque temos un informe que creo que é serio, sólido e contundente, e creo que hai un clamor social en Compostela sobre a necesidade de impor esa taxa turística e ademais van por esa vía todas as cidades europeas. Eu son optimista. Creo que, independentemente do que el poida pensar ou non, eu quédome coa idea de que vai ter que facerlle caso non só ao que diga este goberno, senón ao que di o conxunto da sociedade compostelá", sostivo a alcaldesa.

SUBIDA CANON SOGAMA
Por outra banda, tras a proposta de subida do canon que Sogama trasladou esta semana a concellos que tratan os seus residuos na súa planta, Sanmartín asegurou que aínda non tivo tempo de manter unha reunión conxunta co concelleiro e con persoal técnico e avanzou que a próxima semana estudarán a repercusión desa subida e o que significa.

Con todo, reafirmou que se trata dunha subida que ten que ver con "un buraco que ten Sogama" e coa "aposta da Xunta por un modelo contaminante, arcaico, obsoleto e que a Xunta xa sabía que había directivas europeas que o Estado non ten máis remedio que aplicar" e que, na súa opinión, "é lóxico que apliquen".