Ana Pontón pide apoio masivo na "gran manifestación" pola sanidade pública

A portavoz nacional do BNG, Ana Pontón, pediu este xoves á cidadanía galega que acuda de forma masiva á manifestación en defensa da sanidade pública convocada para o domingo en Santiago, e comprometeuse a "trasladar" ao Parlamento galego "o malestar da cidadanía polos recortes", así como reclamar a posta en marcha dun plan de mellora no servizo de Atención Primaria.

Así o trasladou momentos antes de reunirse coa comisión de centro do Complexo Hospitalario Universitario de Ourense (CHUO) en compañía da deputada provincial Noa Presas, coa intención de coñecer en que estado se atopan as reclamacións dos traballadores.

Para a portavoz nacional do BNG, a sanidade pública galega "está en estado de shock" polo "virus dos recortes e privatizacións do Goberno de Alberto Núñez Feijóo", e instou á cidadanía para sumarse á mobilización convocada o día 4 de febreiro por SOS Sanidade Pública nas rúas de Santiago.

"É necesario unir a voz de todos os galegos nesa gran manifestación para reclamar ao Goberno galego máis medios e recursos; así como que se freen as privatizacións", concretou.

Tamén reclamou "máis medios" para que o CHUO poida afrontar os seus "numerosos problemas", como listas de espera, a situación do servizo de hemodinámica ou o "desmantelamento" de Cirurxía Pediátrica.

"OS RECORTES MATAN"

Pontón insistiu en que "a alternativa non pode ser privatizar e facer da saúde un negocio, senón dotar máis recursos e frear a descapitalización impulsada polo Goberno de Núñez Feijóo", porque "os recortes matan e hai que dicir xa abonda".

Ademais, comprometeuse a que o BNG "mova ficha no Parlamento" e "ofreza alternativas concretas" para dar resposta ao "malestar da cidadanía".

Nesta liña, lembrou que a súa formación rexistrou esta semana unha reforma da Lei de Orzamentos para instar á Xunta a invertir 234 millóns de euros para "contratar persoal e mellorar a Atención Primaria".

Pola súa banda, a parlamentaria do BNG Noa Presas, confirmou que a súa formación "trasladará" ao Parlamento galego as reclamacións dos traballadores do servizo de Limpeza do CHUO que protestan pola falta de persoal tras a ampliación do centro sanitario.

FOLGA DO SERVIZO DE LIMPEZA

Por parte do BNG trasladouse "todo o apoio" á convocatoria de folga indefinida, convocada a partir das 24,00 horas do próximo domingo (4 de febreiro), e insistiu en que "non é de recibo" que as representantes do colectivo "aínda" non fosen recibidas pola xerencia do CHUO, a pesar de que a convocatoria de folga formalizouse o pasado 23 de xaneiro.

Para Presas é "delirante" que os servizos mínimos "supoñerán que haberá máis traballadoras en activo durante a folga, que cando non a hai" e insistiu en que "non é de recibo que non haxa limpeza os fins de semana e que as traballadoras teñan un 'cociente' moi superior á recomendada na normativa de riscos laborais".

Ademais de entrevistarse cos representantes do servizo de limpeza, Pontón e Presas analizaron en que estado atópanse as demandas da comisión de centro, que esixe que non se reduzan os orzamentos do CHUO; así como o cumprimento da promesa inicial de de 44 camas por planta, fronte ás 36 comprometidas finalmente polo Goberno galego.

REUNIÓN COA XERENCIA

A presidenta da comisión de centro, Asunción Maus, afeou ao conselleiro de Sanidade, Jesús Vázquez Almuiña, que apuntase que a convocatoria da manifestación deste domingo "baséase en manifestacións e datos equivocados".

Respecto diso, considerou que "é el quen descoñece a situación das camas e os hospitais e o que vive nun mundo ideal". "Sabemos do que estamos a falar, porque o vivimos todos os días", apostilou.