Un fallo eléctrico obriga a parar temporalmente a actividade na refinería de Repsol

A columna de fume visible desde Riazor.

Un fallo eléctrico rexistrado na refinería de Repsol en Arteixo, por causas aínda "descoñecidas", provocou unha parada imprevista nalgunhas unidades da planta e causou unha columna de lume e fume visible desde diferentes puntos da cidade.

Segundo informou a propia compañía, sobre as 13:30 horas produciuse na planta un fallo eléctrico de causas descoñecidas, que causou o que se coñece como 'episodio de facho', isto é, un aumento do tamaño do lume e o fume do facho de Nostián. Con todo, e a pesar das súas dimensións, este feito está "dentro dos parámetros de funcionamento" da planta, polo que "non supón ningún risco nin para os empregados, nin para a contorna máis próxima". Tras ter coñecemento deste fallo, a refinería contactou coas autoridades e as asociacións veciñais para informarlles do sucedido e tranquilizalos. 

Os fachos, aclarou Repsol, "forman parte dos mecanismos de seguridade do Complexo Industrial" e actívanse en momentos puntuais, como poden ser as paradas das unidades produtivas, como neste caso, ou ao comezo dos procesos de posta en marcha dalgunha destas unidades. "O facho é un sinal inequívoco de que os mecanismos de seguridade han funcionado correctamente", destacou.