Silva encarga un estudo independente do mapa de emerxencias

A Deputación de Pontevedra anunciou que encargará "de forma inmediata" un estudo externo para avaliar "a situación" do actual mapa de emerxencias na provincia e analizar "con todo tipo de datos" se sería "efectivo" o novo modelo que propón a Administración autonómica.

Así o avanzou a través dun comunicado de prensa emitido este xoves no que o ente provincial tamén lle solicita ao presidente da Xunta que organice un encontro cos alcaldes de Vigo, Abel Caballero, e Pontevedra, Miguel Anxo Fernández Lores, para estudar a proposta de modificación do mapa de emerxencias.

Deste xeito, o goberno provincial que dirixe Carmela Silva avanza o encargo a unha consultora externa especializada dun informe "obxectivo, rigoroso e independente", que deberá "estudar co máximo rigor a situación do actual mapa de emerxencias" en Pontevedra e "as súas necesidades", así como analizar "o modelo que quere aplicar o goberno de Núñez Feijóo".

A deputación apunta que a proposta do Executivo autonómico carece de "contidos e datos obxectivos" e que, por tanto, trátase de "un anuncio que ata o momento non vai máis aló dun simple enunciado", xa que a Xunta "non presentou contido algún, nin informes que o avalíen técnica e economicamente".

Por iso, o ente provincial quere que a avaliación externa inclúa un "estudo económico en profundidade" para "coñecer os recursos que serían necesarios" co obxectivo de "saber realmente se o modelo anunciado pola Xunta sería efectivo e daría unha solución obxectiva á actual problemática do mapa de emerxencias".

Así mesmo, tamén sinala que pretenden que o estudo sexa "o máis exhaustivo posible" no relativo á cobertura do territorio da provincia para saber se resolvería os problemas nas zonas de sombra que afectan a varios concellos de Pontevedra.

REUNIÓN CON CABALLERO E LORES

Por último, a Deputación de Pontevedra tamén expresou o seu desexo de que Núñez Feijóo acceda a reunirse cos rexedores de Vigo, Abel Caballero, e Pontevedra, Miguel Anxo Fernández Lores, para informar os rexedores das principais cidades da provincia sobre os cambios que traería o novo modelo de emerxencias.

Nesta liña, lembran que o actual mapa "foi deseñado" polo ex presidente da Deputación, Rafael Louzán, e o vicepresidente autonómico, Alfonso Rueda, ao que acusan de "recoñecer o seu fracaso" ao platear "con fume" unha reforma do sistema.