​Quito elixe a capital galega como referente en rehabilitación

Os expertos reuníronse co alcalde. Foto: Concello de Santiago

Arquitectos e expertos da cidade ecuatoriana de Quito visitan estes días Santiago de Compostela para coñecer os traballos de rehabilitación e xestión do centro histórico da cidade, declarado Patrimonio da Humanidade.

Nun comunicado, o Consorcio compostelán explicou que a cidade de Quito traballa nun plan de xestión do seu centro histórico e, en colaboración coa Axencia Española de Cooperación Internacional para o Desenvolvemento, elixiu Santiago e Málaga como referencias "innovadoras e sustentables". Así, os proxectos de ambas as urbes serviranlles para o deseño e implantación dos seus respectivos plans.

Precisamente, segundo lembrou o Consorcio, con motivo desta iniciativa, un equipo de expertos da capital galega desprazouse a Quito o pasado mes de outubro para participar nun programa de asesoramento e explicar máis o modelo de Santiago.

En concreto, ao longo deste luns, os equipos de Quito e Málaga mantiveron unha serie de reunións tanto con técnicos municipais como con técnicos do Consorcio de Santiago. Ademais, durante a xornada, na que foron recibidos polo alcalde, Martiño Noriega, realizaron diversas visitas guiadas por distintos inmobles da cidade.

Os grupos procedentes de Quito e Málaga participan tamén no encontro de Cidades Patrimonio da Humanidade Españolas, que se celebra en Santiago este martes, día 28 de novembro, no Museo das Peregrinacións.