Noriega di que a taxa turística "é un debate que chegou para quedar"

Turistas en Praterías.

O alcalde de Santiago, Martiño Noriega, mostrouse "convencido" de que a taxa turística "acabará chegando" á cidade: "A taxa é un debate máis. Eu estou convencido de que acabará chegando, outra cousa é cando", subliñou.

En concreto, Noriega pronunciouse deste xeito na rolda de prensa tras a habitual xunta de goberno local e despois de que o vicepresidente do Goberno galego, Alfonso Rueda, rexeitase este xoves o establecemento dunha taxa turística porque a cre "contraproducente" para os obxectivos que nesta materia ten a comunidade e ao entender que en Galicia "non se dan os criterios obxectivos" para a súa posta en marcha.

Este debate xurdiu a raíz do estudo que presentou este xoves o goberno municipal de Santiago, realizado polo catedrático Luis Caramés e referido, en concreto, á capital galega.

Así as cousas, Noriega instou á Xunta a dialogar sobre a gobernanza do turismo na cidade "sen caer en reducionismos". "É un debate que chegou para quedar", confiou o alcalde compostelán, xusto antes de defender a solvencia académica de Caramés e de criticar que o Goberno galego cortase calquera tipo de debate "sen ter a posibilidade de estudar nin de ler o" dito estudo.

Aínda que asegurou que desde o Concello de Santiago están "afeitos á posición inmobilista" da Xunta e, en consecuencia, din non estar sorprendidos polas declaracións de Rueda, si admitiu que están "entristecidos".

Con todo, o alcalde afirmou que enviará o dito informe tanto ao presidente como ao vicepresidente da Xunta para que poidan contestar axustándose a este documento. E é que, argumentou, este debate "non emerxe da nada", senón que o fai dun foro, defendeu, no que participa o sector da hostalería --a nova xunta directiva da Asociación Hostalería Compostela presentou este venres as previsións de ocupación para outubro e algunhas das súas principais liñas de actuación--.

DEBATE NOUTRAS CIDADES

"Este debate da gobernanza do turismo está a darse noutras capitais europeas que teñen unhas cifras de turismo e un impacto importante", sinalou o rexedor, para logo admitir que o turismo é "un dos principais recursos" de Santiago, pero que "outra cousa é a socialización desa riqueza que se xera".

A continuación, fixo fincapé en que comeza a ser algo "xeneralizado" o pensamento de que é "necesario" debater sobre a gobernanza do turismo "sen caer en reducionismos". "Equiparar calquera debate cunha posición de fobia ao turismo é infantil. Agradezo á hostalería a súa posición: Eu estou convencido de que é un debate que chegou para quedar", resolveu.

Ademais, considera que xa hai unha "certa desestacionalización" do turismo grazas, en parte, á aposta por situar eventos "fóra dos picos altos". De feito, indicou que a chegada de turistas é cada vez "máis constante" e non se centra tanto no verán. "Hai unha maior repartición", apostilou.