A capital necesita que os turistas pasen máis días de visita
Os expertos cren que para mellorar o atractivo "é necesario aumentar a relación calidade-prezo dos servizos".
Os profesores da Facultade de Ciencias Económicas e Empresariais Xosé Antón Rodríguez, Fidel Martínez-Roget e Pilar González-Murías analizaron os datos turísticos de Santiago nun traballo publicado na revista Annals of Turism Research sobre a duración das estancias dos visitantes que chegan a Santiago, no que, ademais, fan unha serie de recomendacións para unha planificación turística efectiva a medio e longo prazo.
Segundo recolle o traballo, aproximadamente o 33% dos visitantes que chegan a Santiago son excursionistas, persoas que permanecen unha media de entre 6 e 7 horas na cidade sen facer noite. O 66% por cento restante, os turistas, rexistran unha estancia media de ao redor de 2,5 noites.
Dentro desta dualidade entre excursionistas e turistas, a investigación identifica tres perfiles específicos de visitantes de Compostela: visitantes dun día, turistas de curta estancia e os de estancias relativamente máis longas.
Os resultados "suxiren que no primeiro caso son persoas novas ou xubiladas que viaxan por lecer maioritariamente, en grupos organizados por terceiros e cuxo destino principal non é a cidade". O turista de curta estancia visita Santiago "principalmente con fins relixiosos ou de peregrinación, organizou a viaxe de maneira independente, non está xubilado e ten un nivel de educación medio-alto".
Finalmente, o terceiro colectivo identificado "viaxa a Santiago principalmente por motivos de negocios ou congresos e ten a cidade como principal destino da viaxe, elixe o transporte público, é probable que proceda do exterior da Península Ibérica e a súa decisión, a miúdo, está influenciada polo atractivo e a promoción do destino", explican os investigadores.
MAIOR DURACIÓN
Á vista destes perfís e coa finalidade de aproveitar "todo o potencial de Santiago de Compostela como destino turístico", o equipo responsable do traballo apunta que "a industria e os responsables políticos deben ter en conta que o obxectivo estratéxico da cidade debe ser dobre: alentar aos excursionistas para quedar polo menos unha noite e aumentar a estancia media dos turistas".
Entre outras propostas, os autores do traballo suxiren que "para continuar mellorando o atractivo xeral da cidade é necesario aumentar a relación calidade-prezo dos servizos dispoñibles". Para logralo, os investigadores consideran necesario proporcionar aos traballadores do sector capacitación en idiomas, xestión ambiental, innovación ou novas técnicas de venda, entre outros.
Escribe o teu comentario