​"As actividades sobre igualdade teñen que interpelar aos homes"

José Expósito e Marta Lois. Foto: Concello de Santiago

A capital galega acollerá o obradoiro ' Autocoñecemento para o cambio', unha actividade destinada para o público masculino co obxectivo de abordar a perspectiva dos participantes sobre os roles de xénero.

Esta actividade foi presentada este martes por parte da concelleira de Igualdade, Marta Lois, e José Expósito, do colectivo Micromachinhos, e celebrarase os días 24, 25 e 26 de novembro e o 15, 16 e 17 de decembro no Centro Social do Matadoiro.

"Desde o Concello e desde o Departamento de Igualdade consideramos que as actividades a favor da igualdade teñen que interpelar aos homes", para "construír novas masculinidades para un novo tipo de relacións", indicou Marta Lois respecto a un taller que, á vista do éxito de anos anteriores, nesta edición ten o dobre de sesións.

O representante do Grupo de Homes pola Igualdade Micromachinhos, José Expósito, apuntou que, desde hai ano e medio, este grupo está a realizar actividades dirixidas aos homes. Máis en concreto, este taller é o último dun ciclo de accións que "foron moi ben acollidas polos homes". En concreto, lembrou que este taller tiña inicialmente 15 prazas, ampliando ata as 19 e con lista de espera. "Non tardamos en encher as prazas nin tres días desde que sacamos a primeira publicidade", declarou sorprendido.

As accións ao amparo desta iniciativa serán guiadas pola experta en estudos de xénero Tareixa Ledo, abordando temas como as relacións entre homes e mulleres desde unha óptica de xénero, ou a orixe da violencia de xénero e a simboloxía que a representa.