A Oficina de Atención ás Vítimas do franquismo abrirá en 2018
Así o anunciou o alcalde da Coruña, Xulio Ferreiro, nun acto público.
O Concello da Coruña poñerá en marcha a Oficina de Atención ás Vítimas do franquismo para asistir a aquelas persoas que "aínda por familiares desaparecidos ou por non ser compensadas suficientemente, necesiten axudas dos poderes públicos".
O alcalde da cidade, Xulio Ferreiro, anunciouno durante a rolda de prensa da inauguración das xornadas 'Memoria e Democracia' no paraninfo da Universidade da Coruña. A Oficina de Atención ás Vítimas, que pretenden poñer en marcha principios de 2018, estará tamén centrada en labores de investigación e recuperación da memoria histórica.
"Farémolo en colaboración coa Universidade da Coruña e tamén haberá unha Cátedra da Memoria que levaremos a medias entre o Concello e a UDC", declarou o edil ante os medios. Á súa vez, destacou que a cidade nestes dous últimos anos foi avanzando na recuperación da memoria histórica, "non só no cambio do rueiro senón tamén na construción desa Comisión pola Memoria e tamén na participación na mesa do Pazo de Meirás"
"Unha democracia de calidade é unha democracia que teña memoria histórica", comentou a vicepresidenta da Deputación da Coruña, tamén presente no acto, que avoga por "pasar páxina definitiva" para deixar atrás o franquismo.
Pola súa banda, o presidente da Comisión pola Recuperación da Memoria Histórica da Coruña (CRMH), Fernando Souto, insistiu na necesidade de recuperar a memoria das vítimas do franquismo, tras criticar a postura de España ao "incumprir os dereitos internacionais de reparación a vítimas e a lei de Xustiza Universal".
Escribe o teu comentario