Iglesias mete a Galicia no conflito identitario, "enormemente complexo para a esquerda"

O secretario xeral de Podemos, Pablo Iglesias, afirmou este mércores que no noso país existen "catro nacionalidades que comparten estado", en concreto a española, a catalá, a vasca e a galega, algo que considera "indiscutible", aínda que admitiu que a definición de nación resultou sempre algo "enormemente complexo para a esquerda".

O líder de Podemos realizou esta categorización durante a presentación en Madrid do libro 'Repensar a España plurinacional', na que estivo acompañado do portavoz de En Comú Podem no Congreso, Xavier Domènech, e a secretaria de Plurinacionalidade de Podemos, Meri Pita, e onde Iglesias defendeu que a plurinacionalidade de España está recoñecida na propia Constitución.

"A Constitución do 78, no seu artigo 2, fala especificamente de nacionalidades, e os 'pais da Constitución' dixeron e deixaron escrito que o termo nacionalidade é sinónimo de nación", expuxo Iglesias ante o centenar de asistentes que acudiron ao acto celebrado na Fundación Diario Madrid, entre eles o secretario de Organización de Podemos, Pablo Echenique, e Juan Carlos Monedero, un dos fundadores da formación.

Segundo Iglesias, a plurinacionalidade de España, concretada en Cataluña, País Vasco e Galicia, foi recoñecida mesmo pola dereita procedente do franquismo. Nestes territorios, afirma o líder de Podemos, existen "sentimentos que se identifican co termo nación" que aspiran a ter institucións para "desenvolver eses sentimentos".

Na clasificación de Iglesias habería ademais rexións con "sentimentos populares que reclaman formas xurídicas autónomas e recoñecementos simbólicos propios" que non se poden identificar, na súa opinión, "con amplos sentimentos nacionais" pero "obtiveron recoñecemento xurídico de nacionalidade", como Andalucía, Aragón, Comunitat Valenciana, Baleares e Canarias. "En Andalucía, incluso o Estatuto de Autonomía fala de realidade nacional, aínda que en Andalucía non haxa un sentimento maioritario de nación", apuntou Iglesias.

En terceiro lugar, o secretario xeral de Podemos sitúa ás "comunidades históricas", como cualifica a Asturias, Cantabria ou Castela e León, que "reivindican unha personalidade política propia dentro do marco do Estado". E nun caso á parte coloca a Navarra, que segundo Iglesias ten un estatuto "similar aos estados libres asociados".

"O noso país é plurinacional complexo territorialmente e identitariamente", resumiu Iglesias tras a súa exposición, sinalando que a esta visión de España opóñense os "partidos monárquicos" que considera o país como "uninacional" e non teñen capacidade de "sedución" nin "convencemento" para que o seu proxecto sexa apoiado por maiorías.

"Quen di que España é uninacional non entendeu nada da historia dos últimos 200 anos", proclamou Iglesias, que defende os "valores republicanos" como a "única concepción patriótica" que pode propor un proxecto de España na que "caiban Cataluña e Euskadi".