Pechar as centrais nucleares subiría o prezo da luz outro 25%

O ministro de enerxía, turismo e axenda dixital, Álvaro Nadal, advertiu este mércores no Congreso que pechar as centrais nucleares do país carrexaría un incremento no prezo da luz do 25%. Asegurouno en resposta a unha pregunta da parlamentaria de Unidos Podemos Ione Belarra sobre a pobreza enerxética.

Ademais, Nadal tamén sinalou que "pechando as centrais de carbón nas portas do inverno", algo que segundo o ministro propuxo o grupo parlamentario de Unidos Podemos, "supoñería un 15% máis de prezo".

O ministro lembrou que xa existe un bono social aprobado co consenso do conxunto da Cámara, excepto o grupo que lidera Pablo Iglesias, no que "se fixaron niveis de renda, creouse a figura do consumidor con vulnerabilidade severa e estableceuse unha achega do 50% da factura por parte do sistema enerxético, en lugar do 100% que ata agora corría a cargo das comunidades autónomas".

Con todo, Belarra fixo alusión aos máis de cinco millóns de persoas que aínda sofren de pobreza enerxética en España e aos máis de 100 euros no incremento da factura da luz que este ano terán que asumir os españois, algo que, segundo a deputada, asegurou o propio Goberno.