PSA deseña para Opel un futuro con menos modelos de coches e máis caros

O Grupo PSA ten pevisto recortar o número de modelos da gama de Opel, á vez que tamén controlará os descontos que aplica a división alemá, segundo informaron fontes próximas á situación ao diario alemán 'Frankfurter Allgemeine Zeitung'.

O consorcio automobilístico francés atópase na actualidade en pleno proceso de integración de Opel/Vauxhall na súa estrutura de negocio, despois de que adquirise esta división a General Motors a principios deste ano.

Os máximos responsables do Grupo PSA, Carlos Tavares, e de Opel/Vauxhall, Michael Lohscheller, presentarán o vindeiro mércores o novo plan de recuperación da compañía con sede en Rüsselsheim que busca recuperar a rendibilidade no próximos tres anos.

Este programa recolle o obxectivo de Tavares de reducir a práctica de Opel de comercializar os seus vehículos con altos niveis de descontos. O grupo francés xa mostrou a súa intención de utilizar a súa propia tecnoloxía e as súas plataformas de vehículos en futuros modelos de Opel para reducir custos.