O Goberno non celebra ata o sábado o consello de ministros para aplicar o 155
O presidente do Parlamento Europeo, Antonio Tajani, reiterou que "ninguén en Europa podería aceptar" a independencia unilateral de Cataluña. "Van estar sós", avisa.
O portavoz do Goberno e ministro de Educación, Cultura e Deporte, Iñigo Méndez Vigo, sinalou que o sábado aprobarán, nun Consello de Ministros extraordinario, medidas ao amparo do artigo 155 da Constitución para "restaurar a legalidade" en Cataluña, "recuperar a convivencia pacífica" e "frear a deterioración da inseguridade política e xurídica". De feito, subliñou que "ninguén dubide" que o Executivo dará pasos nesa dirección.
Minutos despois de coñecer a resposta de Puigdemont, o Executivo difundiu un comunicado confirmando que continuará cos trámites previstos no artigo 155.
Precisamente, responsables de Goberno e PSOE reuníronse esta mañá para "pechar definitivamente" as medidas que se tomarán en amparo do artigo 155 da Constitución ante o desafío independentista.
O xefe do Executivo xa se entrevistou o pasado martes no Palacio da Moncloa con Pedro Sánchez e onte fíxoo tamén con Albert Rivera.
Dado que Rajoy está durante hoxe e mañá en Bruxelas para participar no Consello Europeo, será o sábado cando reunirá ao Consello de Ministros de maneira extraordinaria para aprobar as medidas do 155 e elevalas ao Senado.
Desde Europa, o presidente do Parlamento Europeo, Antonio Tajani, reiterou o aviso de que "ninguén en Europa podería aceptar" que Carles Puigdemont proclame a independencia de Cataluña, polo que non recibirá axuda "nesta dirección". "Van estar sós", avisa.
Tajani declarou nunha entrevista en COPE que o desafío soberanista por parte de Cataluña "non é un problema" da Unión Europea senón de España e é por iso que, segundo recomendou, a solución ten estar "no interior do marco xurídico español" e dentro da Constitución española.
Como explicou Tajani, a postura da UE respecto da cuestión catalá é "a favor do diálogo" e mostrouse contundente ante a posibilidade de que os líderes soberanistas proclamen a independencia de forma unilateral.
Escribe o teu comentario