Cataluña, "ao límite" á espera da próxima manobra dos independentistas

O Parlament ten un dispositivo especial de seguridade.

O presidente da Generalitat, Carles Puigdemont, ultima unha declaración sobre a independencia de Cataluña este martes no Parlament, mentres hai múltiples contactos durante as últimas horas entre os soberanistas sobre como articular o camiño a unha hipotética república.

Puigdemont prevé que o seu discurso, convocado ás 18 horas, se ampare no resultado do referendo: o sector soberanista quere que sexa unha declaración de independencia aínda que difire en se debe ter efectos inmediatos ou entrar en vigor máis adiante.

A Generalitat confía en que se acabe xerando a presión suficiente sobre o Estado para que o presidente do Goberno acepte algunha das propostas de mediación internacional.

CHEGAR "AO LÍMITE"

A portavoz do PSOE no Congreso, Margarita Robles, dixo este martes que o seu partido quere "confiar e esperar" que prevaleza o "sentido común" en Cataluña e chamou ao presidente da Generalitat, Carles Puigdemont, a "non levar ao límite" a situación coa declaración unilateral de independencia.

Para concluír, sinalou que hai que "loitar e traballar pola convivencia" e para iso ve necesarios "líderes" capaces de "facer un exame da realidade pensando nos cidadáns".

REBELIÓN CONTRA O ESTADO

O ministro de Economía, Industria e Competitividade, Luis de Guindos, asegurou este martes que "o que está a ocorrer é un ataque á Constitución española e á legalidade española" e, aínda que se trata de "unha ofensa moi importante", subliñou que está "tranquilo" porque "a resposta do Goberno español será a adecuada".

"Nestes momentos xa estamos nos minutos finais. Todo depende do señor Puigdemont e eu o que espero é que volva o sentido común, non soamente polo conxunto de Cataluña son tamén polo conxunto de España e de Europa", confiou.

O ministro recoñeceu que cando se produce "unha ofensa ao Estado de Dereito tan intensa e tan importante" como a de Cataluña "evidentemente xera inquietudes".