Rajoy discute co PP, Sánchez e Rivera o escenario político que enfronta España

Os independentistas ameazan con seguir adiante.

As cargas policiais da Policía Nacional e a Garda Civil para tentar evitar a votación no referendo ilegal ilustran boa parte das portadas deste luns dos principais rotativos europeos. Nos titulares, destacan a "crise", os feridos ou a "forza bruta".

Neste contexto, Mariano Rajoy convocou esta tarde na Moncloa a Pedro Sánchez para analizar o escenario político aberto en Cataluña. Despois recibirá a Albert Rivera.

Estas entrevistas prodúcense despois de que o propio Rajoy anunciase onte á noite nunha comparecencia sen preguntas que abriría unha rolda de contactos cos partidos que teñen representación parlamentaria no Congreso para "reflexionar" sobre un futuro que teñen que abordar "xuntos".

DECLARACIÓN UNILATERAL

Sobre a mesa estará unha posible declaración unilateral de independencia, unha vía que o presidente da Generalitat, Carles Puigdemont, deixou aberta. Así, dixo onte á noite que no 1-O "gañou o dereito a ser un Estado independente", polo que en "os próximos días" trasladará ao Parlamento catalán o resultado do referendo para que decida se proclama unha declaración unilateral de independencia, de acordo coa suspendida lei de transitoriedade.

Ata o momento, o Goberno do PP non falou en ningún momento de aplicar o artigo 155 da Constitución, que permitiría suspender a autonomía de Cataluña e sobre o que os socialistas manifestaron as súas reservas en máis dunha ocasión.

Fontes do PP sinalaron que se finalmente hai unha declaración unilateral de independencia, o Executivo "non terá máis remedio" que acudir a esa vía que lle ofrece o Estado de Dereito.

Antes de verse con Sánchez e con Rivera, o presidente do Goberno analiza a situación esta mañá co comité de dirección do seu partido.

"EQUIDISTANCIAS"

Pola súa banda, Pablo Iglesias considera o Goberno responsable da deriva do conflito en Cataluña e dos enfrontamentos que tiveron lugar este domingo. Ao seu xuízo, non se poden establecer equidistancias "entre quen utilizou a forza pública para reprimir á xente e quen estaba propoñendo unha mobilización política".

Ademais, criticou a "enorme torpeza" do líder do PSOE por seguir confiando en Rajoy para que lidere o diálogo.

"O PSOE ten que elixir dunha vez. Apoiar este Goberno é apoiar a destrución de España", manifestou, á vez que asegurou que aínda que agora "non recoñece" ao Pedro Sánchez que gañou as primarias socialistas hai uns meses, espera que "rectifique" e aposte por explorar xunto a Podemos a construción dunha maioría alternativa cunha nova moción de censura, que saque ao PP da Moncloa.