Cinco grupos de empresas optan a construír o 'gran Montecelo'

Hospital Montecelo, en Pontevedra.

O conselleiro de Sanidade, Jesús Vázquez Almuiña, avanzou que un total de cinco unións temporais de empresas (UTE) presentaron as súas propostas para a construción do 'gran Montecelo', o hospital pontevedrés que abarcará unha superficie de case 120.000 metros cadrados.

Ante o pleno da Cámara, preguntado polo deputado do PPdeG Jacobo Moreira, o titular de Sanidade confirmou que o ritmo da tramitación fai prever que se poida cumprir o cronograma previsto.

Así, tras iniciarse a apertura de sobres, en "dous ou tres meses" poderase contratar o proxecto básico. A continuación ábrese, como dixo, outra fase de catro meses e medio para a planificación dos traballos e a súa exposición pública; seguida doutra de catro meses para a redacción do proxecto básico e a urbanización da contorna.