A Villares non o trasladan polas eólicas e ás outras xuízas é para mellorar, di o TSXG

Aumentan as críticas contra os traslados forzosos dos maxistrados do TSXG que levaban anos fallando en contra dos parques eólicos da Xunta. Ecoloxistas, partidos da oposición e o colectivo Xuíces e Xuízas para a Democracia criticaron a decisión a nova presidenta da Sala do contencioso-administrativo do Tribunal Superior de Xustiza de Galicia María Azucena Recio González de apartar a Luís Villares e a outras maxistradas de sección.

Desde o TSXG deféndense e desvinculan a decisión das durísimas presións empresariais e mediáticas que leva anos soportando Villares desde que volveu á magistratura tras ser líder das mareas galegas.

Por que trasladan a Villares?

Consultadas por Galiciapress , fontes oficiais do Tribunal sinalan que no caso de Villares, a presidenta da Sala toma a decisión "para salvagardar a imparcialidade con que funciona esta Sala" xunto a “as necesidades reorganizativas, atendido o número de procedementos que se tramitan en cada unha das Seccións, por entender que a reestruturación vai reforzar o bo funcionamento da Sala".

A que se refire esa alusión á imparcialidade de Villares? “O da imaxe de imparcialidade vén polas sentenzas do Tribunal Supremo, que non teñen nada que ver cos eólicos”, indican desde a Administración de Xustiza.

Hai que lembrar que o Supremo tombou este xaneiro varias sentenzas da Sala na que participaba Villares sobre o Hospital Álvaro Cunqueiro. Os recorrentes alegaron que o TSXG estaba contaminado polas opinións sobre o tema que Villares expresou cando era líder do principal partido da oposición.

Até agora, a Xustiza fora moi corporativa -#pór ao lado dos xuíces- nos casos de recursos contra a imparcialidade dos maxistrados que volveran aos xulgados tras pasar pola política. Entendíase que, no caso de conceder o amparo a este tipo de recursos, estaba a porse en cuestión o dereito dos xuíces a, chegado o momento, colgar a toga, aínda que sexa provisionalmente, para participar en política. 
 

Por que trasladan ás outras xuízas?

Villares, di o TSXG, foi trasladado á forza para protexer a independencia do tribunal na previsible avalancha de novos casos que se lle veñen encima pero por que se traslada tamén ao outros membros da Sala que non pasaron por política?

Aí as fontes oficiais do TSXG ofrecen unha resposta que, en aparencia, parece burocrática, pois aluden a meras “razóns organizativas” debido ao “número de procedementos que se tramitan en cada unha das seccións, e por entender que a reestruturación vai reforzar o bo funcionamento da Sala". 

Un argumento que Xuíces pola Democracia rebate indicando que as maxistradas que se incorporarán a esa Sala non teñen coñecementos específicos sobre o tipo de sentenzas que estaba a levar ese xulgado, polo que é previsible que se retarde o funcionamento do TSXG. Xuízas e Xuíces para a Democracia é o colectivo de xuíces máis progresista, minoritario nos órganos de goberno dos xuíces. 

Na orde de Recio González tamén se alude a que os traslados forzosos as maxistradas teñen maiores opcións de crecemento profesional, argumento que non se utiliza para a expulsión de Villares. 

O CGPJ xa se puxo ao lado de Recio hai pouco

A decisión do nova presidente da sección do Contencioso administrativo é recorrible. É probable que os maxistrados trasladados á forza presenten recursos. 

Hai que ter en conta que Recio González derrotou a Villares no recente concurso pola presidencia da Sala. O Consello Xeral do Poder Xudicial, con maioría conservadora, escolleuna fronte ao ex-líder de En Marea. Sería moi estraño que, a primeiras de cambio, concedese amparo a Villares menoscabando a Recio. 

Así as cousas, o envurullo político xudicial sobre as eólicas non está, nin moito menos liquidado. Ademais dos probables recursos dos maxistrados contra os traslados forzosos, é probable que cheguen á sala ducias de recursos ás sentenzas sobre os parques eólicos que paralizou preventivamente o TSXG estes anos. Son uns 80, de causísitcas diversas.

O sector eólico e a Xunta levan anos culpando -case sempre polo baixo, sen nomealo directamente, tirando a pedra e escondendo a man- á sala de Villares de trabar o desenvolvemento económico de Galicia por cuestións ideolóxicas.

Non é de estrañar, por tanto, que as circunstancias -verdadeiramente excepcionais- do traslado forzoso de Villares e das súas compañeiras  causen profundas dúbidas en moitos sectores sociais progresistas sobre a imparcialidade da xustiza galega. As mesmas dúbidas que, por outra banda, levan anos alentando empresarios e o PP sobre a imparcialidade de Villares e das súas comapañeras de sala.