Emigración visita Venezuela para ver as necesidades de "galegos en dificultades"

O secretario xeral de Emigración, Antonio Rodríguez Miranda, iniciou unha viaxe a Venezuela para coñecer a actualidade da diáspora galega e "redobrar esforzos" na detención e atención de todos os casos de maior precariedade.

En concreto, Rodríguez Miranda reuniuse co conselleiro de Emprego e Seguridade Social da Embaixada de España en Venezuela, Santiago Camba, que é, ademais, o seu predecesor no cargo de responsable autonómico de Emigración.

Miranda e Camba avaliaron os instrumentos de intervención social que atenden aos galegos residentes no país, un número crecente deles en distintas situacións de precariedade, debido á tensa situación social e política que atravesa o país.

Ademais, entrevistáronse co embaixador de España, Jesús Silva, para reforzar a colaboración entre as administracións central e autonómica neste sentido.

OUTRAS REUNIÓNS

Posteriormente, o secretario xeral de Emigración reuniuse cos presidentes das comunidades galegas con sede en distintas localidades de Venezuela para estudar e poñer en marcha os mecanismos para intensificar a colaboración da Administración autonómica a través das entidades representantes dos paisanos residentes na república.

Deste xeito, materialízase a achega extraordinaria aprobada polo Parlamento de Galicia para ampliar a atención social aos galegos residentes en Venezuela en 600.000 euros, ata alcanzar un investimento máximo superior a 1,5 millóns.

Respecto diso, Rodríguez Miranda agradeceu ás entidades que "estean a redobrar esforzos" para conseguir "que ningún paisano quede sen a atención urxente que necesite".

Ademais, destacou o "importante labor" que realizan estas comunidades no país para "detectar casos de cidadáns galegos en dificultades". "Sempre digo que son as nosas mans e os nosos ollos sobre o terreo", manifestou.

Segundo os últimos datos do Instituto Nacional de Estatística (INE) ao 1 de xaneiro de 2017, na actualidade, residen en Venezuela un total de 43.975 galegos. É dicir, é o segundo país con maior número de galegos fóra de España, unicamente superado por Arxentina.