O Goberno recorre ante o TC outras dúas leis independentistas

Méndez de Vigo, na rolda de prensa.

O ministro portavoz do Goberno, Íñigo Méndez de Vigo, anunciou este venres que o Consello de Ministros acordou recorrer ante o Tribunal Constitucional a Lei de Transitoriedade Xurídica aprobada o xoves polo Parlamento de Cataluña, igual que un día antes decidiu recorrer a lei do referendo secesionista e a súa convocatoria para o 1 de outubro. Tamén decidiu recorrer a lei do código tributario que pretende crear unha Facenda propia.

"O Estado dá unha resposta rápida e eficaz a todos os intentos de vulnerar a orde constitucional; fíxoo e seguirao facendo", remachou o portavoz do Goberno.

Ademais, continúan os movementos xudiciais para impedir a votación. A Fiscalía Superior de Cataluña presentou ante o Tribunal Superior de Xustiza (TSJC) as querelas contra o presidente da Generalitat e os membros do seu Goberno, e pide fixar medidas cautelares, como relata Catalunyapress na súa información.

Entre outras medidas, solicita que, se é necesario, se dea autorización para a entrada e rexistro en domicilios e outros recintos que requiran orde xudicial.

E a Garda Civil rexistra desde primeira hora da tarde unha empresa en Tarragona en que sospeita que se imprimiu material para o referendo.

Amplía esta información en Catalunyapress.