Galicia entrará en alerta por seca se non choven 70 litros por metro cadrado en setembro

A choiva, clave para que os ríos recuperen caudal.

As demarcacións hidrográficas Miño-Sil e Galicia Costa manterán a prealerta por seca durante setembro. Unha vez finalizado este mes e coincidindo coa clausura do ano hidrolóxico, estudarase se se eleva a nivel de alerta por seca en función da evolución das precipitacións ao longo do noveno mes do ano.

Estas foron as principais conclusións extraídas da reunión celebrada este venres da Oficina Técnica da Seca, na que participan as demarcacións hidrolóxicas e técnicos de todos os departamentos da Xunta con competencias na materia --Augas de Galicia, Consellería do Medio Rural, Axencia Galega de Emerxencias e Meteogalicia--.

Así, este órgano acordou manter a prealerta por seca e non elevala ao nivel de alerta. Con todo, puxo o foco en que é necesario prestar atención ás concas do sur da Comunidade galega, que presentan caudais inferiores aos niveis habituais nesta época do ano.

O presidente da Confederación Hidrográfica Miño-Sil, Francisco Marín, sinalou que 2017 está a ser un ano "extremadamente seco" aínda que a situación "non empeorou" respecto ao mes de xullo.

Deste xeito, a Oficina Técnica da Seca volverá reunirse ao termo do ano hidrolóxico --30 de setembro--. Será entón cando, en función das precipitacións que se rexistren ao longo do mes recentemente iniciado, os técnicos estudarán a posibilidade de decretar o nivel de alerta por seca.

A prealerta por seca foi activada a comezos de ano e, en palabras de Marín, os encoros "comportáronse moi ben" e manteñen niveis "do 57%". Con todo, no caso de que non se produzan choivas "de 70 litros por metro cadrado" en setembro, sería preciso elevar o nivel a alerta a partir de outubro.

Esta situación provocaría que se tomasen medidas co obxectivo de "ter en bo recado as augas", como restrinxir os usos non prioritarios e modificar as leis de explotación dos encoros.

Ademais, tamén se obrigaría a reducir a rega de xardíns e o baldeo nocturno. "Non como unha recomendación, senón como unha obrigación", lembrou Francisco Marín, quen asegurou que, en todo caso, o abastecemento á poboación está asegurado e a declaración do nivel de alerta non provocaría cortes de auga para a cidadanía.