Un sinal do Camiño nos restos dunha muralla de hai oito séculos

Alterar a muralla vai contra a lei de patrimonio.

O PSOE de Vilalba denuncia que a Xunta coloca un fito de sinalización do Camiño nos restos da muralla deste municipio, catalogada como Ben de Interese Cultural (BIC) e que data do século XIII.

Respecto diso, os socialistas censuran que a Xunta "incumpre a súa propia lei de patrimonio" coa colocación desta sinalización do Camiño do Norte que afecta á banqueta da muralla, na contorna da rúa da Ferrería.

Sobre este extremo, o PSOE censura que o alcalde de Vilalba "consinta un verdadeiro ataque a este ben cultural e patrimonial", con "unha escasa sensibilidade pola posta en valor do patrimonio".

Así, no próximo pleno pedirán que o Concello adquira a titularidade dos terreos próximos aos 15 metros de muralla para "poñer en valor unha parte importante do patrimonio vilalbés", así como proceder á súa musealización.