Terceira xornada de tormentas que volverán deixar sarabiadas

O luns caeron 3.500 raios en Galicia.

A inestabilidade no tempo resístese a abandonar Galicia, que volve estar en risco por fortes chuvascos e tormentas, acompañadas de sarabia e refachos de vento intensos.

Por terceiro día, espéranse tormentas xeneralizadas que poden ser localmente fortes, con abundante aparello eléctrico e ocasionalmente con sarabia. Ademais, de a nosa comunidade, afectarán ao Cantábrico oriental, Navarra, e ao sueste peninsular.

Con todo, Meteogalicia apunta que os fenómenos deste martes non serán "nin tan fortes nin tan xeneralizados" como en xornadas pasadas. En canto aos próximos días, a previsión sinala que o mércores continuarán as choivas xeneralizadas e o xoves volverá o anticiclón, aínda que cunha baixada de temperaturas.

MÁIS DE 3.500 RAIOS

A tormenta eléctrica e o mal tempo deixaron este luns máis de 3.000 raios en Galicia ao longo da xornada, segundo a información facilitada por Meteogalicia.

En concreto, rexistráronse 3.494 raios concentrados en maior medida entre as catro e as seis da tarde.

As intensas precipitacións rexistradas o luns en varios puntos da Comunidade galega deixaron 49 litros por metro cadrado en Baltar (Ourense) e 46 en Arzúa (A Coruña), localidades na que máis choveu.

E aínda que en Baltar e Arzúa só se rexistraron contratempos puntuais, a intensa chuvia provocou un regueiro de incidencias na capital galega, onde choveu a metade (22 litros por metro cadrado), pero onde nun período de 10 minutos se acumularon 9,1 litros por metro cadrado.

INUNDACIÓNS E AVARÍAS

As intensas chuvias e a tormenta eléctrica que afectaron a Santiago durante a tarde do luns provocaron inundacións en diversas rúas, en baixos comerciais e avarías na rede de semáforos da cidade.

Unha das zonas máis afectadas foi o polígono do Tambre, onde varios coches quedaron bloqueados debido ás inundacións, totalmente cubertos de auga e un deles envorcado. A pesar diso, non se rexistraron feridos.