Ferido un home en Vigo ao que lle explotou un móbil nas mans
Tivo que ser trasladado con queimaduras a un centro sanitario. O fume obrigou aos bombeiros a acudir ao hotel onde estaba.
Un home de 28 anos de idade resultou ferido con queimaduras tras explotarlle un teléfono móbil nas mans cando se atopaba nun hotel de Vigo o domingo pola tarde.
Ademais, o particular que chamou ao 112 Galicia para pedir axuda indicou que a persoa afectada se mareaba. O CIAE puxo en alerta a Urxencias Sanitarias.
Debido ao fume que ocasionou a explosión no inmoble, foi necesario que os Bombeiros da cidade se achegasen ao momento. A Policía Local tamén foi informada do suceso, que tivo lugar sobre as 19,00 horas do domingo.
Ao lugar o 061 enviou unha ambulancia asistencial para atender o ferido, L.F.C.A., de 28 anos, que foi trasladado a un centro de Atención Primaria da cidade olívica.
Escribe o teu comentario