O luns e o martes foron "os peores días de todo o ano" en canto a incendios
En toda a comunidade rexistráronse case 100 lumes. Seguen sen control os de Monterrei, Chandrexa de Queixa e Castro Caldelas, que superan as 900 hectáreas entre os tres.
As xornadas do 21 e 22 de agosto foron "os peores días de todo o ano" a nivel incendios en Galicia, con 98 lumes --tras 200 alertas-- en "zonas historicamente incendiarias" como a comarca de Valdeorras e o distrito forestal de Verín.
Así o expuxo este mércores a conselleira de Medio Rural, Ángeles Vázquez, quen chama a atención sobre que existen "moitos problemas de auga" nestas zonas pola seca, o que "dificulta" os labores do operativo de extinción.
A preguntas dos medios en Santiago, explicou que se traballa para que haxa "cisternas collendo auga dos ríos para encher os puntos esparexidos polo territorio para que poidan cargar as motobombas". Sobre este punto, Ángeles Vázquez indica que os alcaldes lle trasladan esa preocupación por "a falta de auga".
CALOR, VENTO E SECA
Ademais, estes lumes producíronse en dous días con temperaturas que "eran históricas", cunha humidade "baixísima", vento e en zonas "inaccesibles" que "dificultaban" a acción do operativo. Respecto diso, lamenta que "se busca poñer atrancos" aos traballadores que loitan contra o lume.
Desde medianoite do martes, os incendios de Monterrei, Chandrexa de Queixa e Castro Caldelas --que afectan entre os tres a máis de 600 hectáreas-- "están sen chamas" e trabállase para refrescar a zona. Todos eles iniciáronse pola tarde con "intencionalidade" e "un fin de facer moito dano", segundo asegura Ángeles Vázquez.
Con todo, o 80% dos 98 incendios producidos en Galicia entre o luns e o martes foron conatos --aqueles que non superan as 0,5 hectáreas de arboledo queimadas e unha hectárea en raso--.
UN INCENDIARIO CAZADO
Así mesmo, a conselleira de Medio Rural deixa claro que "hai pescudas abertas". En concreto, o martes desde un helicóptero do operativo observouse a unha persoa que se procederá a identificar.
Xunto a isto, incide en que "os incendios non poden saír tan baratos para os incendiarios", pois "é un atentado contra os galegos".
"Temos que ser máis duros", sentencia a conselleira, posto que "unha e mil veces volven repetir os incendios en zonas historicamente incendiarias".
MÁIS DE 900 HECTÁREAS
Os tres incendios forestais de Monterrei, Chandrexa de Queixa e Castro Caldelas, na provincia de Ourense, seguen sen controlar e xa suman 900 hectáreas arrasadas.
O de Monterrei é o lume con máis hectáreas queimadas, con 350, e iniciouse ás 17,41 horas do martes na parroquia de Infesta. Traballan na súa extinción 11 helicópteros, catro avións, 34 brigadas, 19 motobombas, 17 axentes e tres pas.
O lume de Monterrei obrigou a cortar o martes un carril da A-52, a autovía das Rías Baixas, e provocou o corte da subministración eléctrica da zona de Verín para miles de veciños por seguridade dos medios de extinción.
No caso do incendio activo de Chandrexa de Queixa, van 300 hectáreas queimadas. Comezou o martes ao as 19,34 horas na parroquia de Queixa. No seu control están seis avións, dous helicópteros, catro brigadas e tres axentes.
Respecto de Castro Caldelas, o lume, que se iniciou ás 18,27 horas do martes, calcina 250 hectáreas na parroquia de Burgo. Aquí colabora a Unidade Militar de Emerxencia (UME), mentres traballan, entre outros, sete helicópteros, catro avións, 24 brigadas e 14 motobombas.
Por outra banda, permanecen controlados os incendios de: Cervantes (case 100 hectáreas queimadas entre dous lumes), A Pobra de Trives (20 hectáreas) e Montederramo (42 hectáreas).
Escribe o teu comentario