Presentadas máis de 4.200 solicitudes de vivendas turísticas en Galicia

O número de vivendas de uso turístico que presentaron solicitudes para operar en Galicia supera as 4.200 na comunidade, segundo datos da Xunta. O novo decreto que regula este tipo de aloxamentos leva en vigor desde o pasado mes de maio.

O Goberno galego sostén que a medida serviu para "fortalecer e incrementar" a oferta, ao dar seguridade xurídica a particulares e ao sector turístico.

Por provincias, Pontevedra sitúase á cabeza cun total de 2.250 solicitudes presentadas ata a data; en segundo lugar, A Coruña con 1.360 aloxamentos; a estas séguenlles Lugo, con preto de 540, e Ourense, con ao redor de 80.

A Xunta lembrou nun comunicado que, para comezar a operar, os propietarios deben presentar unha declaración responsable de inicio de actividade, cuxo modelo atoparán na páxina web de Turismo de Galicia.

"MODELO FLEXIBLE"

O Executivo galego defende que este modelo é "moi flexible e de moi sinxela aplicación", que se adapta "á realidade actual do turismo" e que se fixo en diálogo co sector.

A continuidade desta lexislación foi confirmada o pasado xullo polo Tribunal Superior de Xustiza de Galicia (TSXG), que desestimou a solicitude de suspensión cautelar solicitada por unha asociación. A Xunta lembrou que a Xustiza sinalou que o decreto "non limita nin restrinxe" a competencia, senón que "pon en orde" a oferta.