A reordenación sanitaria da Xunta segue sumando detractores

A Coordinadora Anti-Privatización da Sanidade Pública e a xunta de persoal do Salnés cren que se está "despexando o camiño á privatización".


|

CentrosaludRecepción dun centro de saúde.


A Coordinadora Anti-Privatización da Sanidade Pública "rexeita tallantemente" o anteproxecto de lei que modifica o mapa da organización territorial do Sergas por considerala "un paso atrás" na mellora da sanidade pública e "avanzar na privatización" e o "desmantelamento" dos hospitais comarcais.


Segundo informou a entidade nunha nota de prensa, esta modificación "garante definitivamente a participación do sector privado" na investigación "con axuda de fondos públicos". Ante isto, considera que a saúde "debe quedar afastada da especulación e a persecución de calquera beneficio" que non sexa da cidadanía.


Desta forma, denunciou que a atención primaria "segue sen ter a importancia que debería no ámbito asistencial" e criticou tamén a reorganización da participación dos 'consellos de saúde', "que seguen sendo meros órganos consultivos" dos que quedan fóra asociacións veciñais e de cidadáns.


Ademais, asegurou que "están atentos" á recentemente creada Axencia de Doazón de Órganos e Sangue (Ados) do Sergas, pois a coordinadora declarou que "non quere que se faga negocio" co sangue e co diñeiro dos cidadáns, tal e como "temen".


A plataforma asegurou que os gobernos converten os sistemas de saúde "en beneficio das empresas", unha práctica que levan a cabo "aos poucos" con "nocturnidade e aleivosía".


"DESPEXA O CAMIÑO Á PRIVATIZACIÓN"


A xunta de persoal da área sanitaria do Salnés expresou o seu rexeitamento á reordenación anunciada, xa que consideran que o novo modelo "é un paso máis para facer desaparecer recursos, especialidades e profesionalidades, despexando o camiño á privatización".


A través dun comunicado emitido este venres, a xunta de persoal do Salnés, área que pasaría a quedar integrada na de Pontevedra, critica o anteproxecto pola "repercusión" que terá na poboación e nos traballadores da comarca.


"A supresión da área Sanitaria do Salnés afastará a resolución de problemas da cidadanía e dos traballadores porque con menos medios nos hospitais comarcais a alternativa será desprazarse aos grandes hospitais", sinalan.


A continuación, aseguran que os centros de saúde de atención primaria quedan relegados á "marxinación". Por todo iso, instaron a sumarse a unha campaña para "parar" o anteproxecto da modificación das áreas sanitarias a través do envío de suxestións ao Portal de Transparencia da Xunta.


Así, habilitaron un texto para ser enviado ao Goberno galego antes do 17 de agosto --data na que remata o prazo-- no que se reclama ao Parlamento galego "un trato no mapa sanitario que se corresponda coas necesidades reais da comarca do Salnés".

relacionada Feijóo rexeita cuestións "mercantilistas" na reordenación sanitaria
relacionada O PSdeG esixe debate e consenso para a reforma da Lei de Saúde galega

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal - Política de Cookies - Política de Privacidade - Configuración de cookies - Consello editorial - Publicidade
Powered by Bigpress
CLABE