O Celta despídese de Inglaterra, onde deixa un amigo para sempre

O Celta está na casa do Leverkusen. Foto: RC Celta

O Celta xa está en Alemaña para continuar coa súa pretemporada, tras os dez días que os celeste pasaron en Inglaterra, sen demasiado éxito en canto a vitorias, ao perder por 2-1 contra o Brentford e empatar a 2 goles ante o Burnley.

O que si colleitou o club vigués foi a simpatía eterna dun club local. E é que o seu capitán, Jordan McCourt, ex xogador do Tenerife, non dubidou en utilizar Twitter para contactar co Celta e tentar cumprir o seu soño e o do seu equipo de adestrar cun "primeira división".

Os celestes xustificaron a súa negativa en que "o corpo técnico céltico conta cun plan de traballo minuciosamente deseñado", pero convidaron á comitiva do club británico a un adestramento, onde se coñeceron e intercambiaron camisetas.

A quilómetros de distancia, este sábado afrontan o terceiro encontro da xira, contra o Bayer Leverkusen, antes de regresar a Vigo.

A próxima semana, dúas citas ante rivais italianos en Balaídos, contra o Udinese e a Roma. Dous choques máis para corrixir erros e adaptarse ao que pide Unzué.