Un de cada dez maltratadores incumpre as ordes de afastamento

Preocupa o incumprimento das medidas de protección contra o machismo.

O Defensor do Pobo en funcións, Francisco Fernández Marugán, iniciou unha actuación de oficio ante a Delegación do Goberno para a Violencia de Xénero, co obxectivo de coñecer os motivos polos que aumentou o incumprimento das ordes de afastamento en casos de violencia machista, e polos que descendeu a suspensión do réxime de visitas de maltratadores aos seus fillos, segundo informou a institución.

Concretamente, advirte de que o último informe do Observatorio contra a violencia doméstica e de xénero, publicado polo Consello Xeral do Poder Xudicial (CGPJ), mostra que no primeiro trimestre de 2017 se triplicaron os quebrantamentos de ordes de afastamento, alcanzando case un 10%, e caeron un 3% as suspensións do réxime de visitas dos pais maltratadores aos seus fillos e un 5% a retirada da custodia.

Por iso, solicitou á dita delegación que avalíe o impacto das últimas normas para protexer as vítimas de violencia machista e os seus fillos.

Para o Defensor do Pobo, é necesario outorgar protección "rápida" e "eficaz" aos fillos e fillas das mulleres vítimas de violencia de xénero, para evitar que se sigan producindo asasinatos de menores de idade a mans dos seus pais maltratadores (no últimos catro anos 21 nenos foron asasinados).

A institución lembra que mantén aberta outra actuación, á espera de recibir información, sobre as medidas específicas adoptadas para a modificación do sistema de protección á infancia e á adolescencia, en todo o relacionado con fillos e fillas de vítimas de violencia de xénero.

O Defensor do Pobo apunta que comparte o criterio de Nacións Unidas que, a través do seu Comité para a eliminación de todas as formas de discriminación contra a muller (CEDAW), recomendou a España que os antecedentes de violencia de xénero sexan tidos en conta no momento de estipular os dereitos de custodia e visita relativos aos fillos.