Expertos galegos reclaman ingresos e gastos máis flexibles para os municipios

Marta Oviedo e Alberto Vaqueiro, na presentación do informe.

Expertos da Red Localis --formada por profesores e investigadores das tres universidades galegas-- piden "maior autonomía" para os municipios, "flexibilizar" a regra de gasto e eficacia na capacidade fiscal.

O profesor titular da Universidade de Vigo, Alberto Vaqueiro; e a interventora Marta Oviedo presentaron este xoves o informe 'Os problemas orzamentarios das entidades locais: ingresos e gastos', elaborado por Oviedo e Xaquín Álvarez.

Entre as súas conclusións, os autores identifican unha "imprescindible" modificación na estrutura orzamentaria "ríxida" actual, que permita aos concellos imputar gastos que habitualmente se prestan por estes "dunha forma máis eficiente e áxil".

Tamén advirten de que se atopan "limitados para utilizar o seu superávit" e propoñen unha "reformulación" da regra de gasto "tendo en conta dos problemas presentes na maioría" de consistorios.

PROPOSTAS

En primeiro lugar, a Red Localis, co seu novo documento, propón "dotar de maior autonomía aos municipios e deputacións", para "que deixen de depender do resto das administracións".

Respecto diso, Marta Oviedo e Alberto Vaqueiro explicaron que, aínda que "non é popular subir impostos, hai que facelo". Ademais, destacaron que cando o contribuínte é "consciente de cando paga", logo tamén é "máis esixente" no control dos servizos que se prestan.

Tras subliñar a relevancia desa "concienciación fiscal", puxeron exemplos nos que poderían actuar os municipios, como o IBI ou bonificacións existentes, pero, segundo recalcaron, "habería que estudar caso por caso".

En segundo termo, o estudo avoga por "axustes" como o uso do remanente de tesourería para financiar gastos non estruturais na administración local --indica que isto "non pode producir inestabilidade"-- e pola incorporación de remanente tamén para gastos con financiamento afectado --"tampouco pode ser causa de incumprimento da estabilidade", segundo apunta--. De feito, aposta por unha "flexibilización" do criterio de inestabilidade.

"É necesario dotar de autonomía a administración local no uso do superávit orzamentario para realizar investimentos financeiramente sustentables", engade.

En terceiro posto, incide en que a regra de gasto "debería flexibilizar" a súa aplicación, e, en cuarto, ve "necesaria unha nova orde, ou unha reformulación da existente, en materia de orzamentos locais, tendo en conta que a normativa autonómica de adaptación da lei de racionalización da administración local permite seguir prestando aqueles servizos que viñan prestando sempre que non poñan en risco a estabilidade e sustentabilidade do municipio".

Nun anterior documento, esta rede propuxo máis recursos para os concellos, pero con este, segundo chamaron a atención os seus autores, o que se busca é maior eficiencia "cos actuais".