Rueda asume só en parte a necesidade de redeseñar o mapa de emerxencias

Rueda rexeita que "esa reestruturación teña que ser total".

O vicepresidente da Xunta e conselleiro de Presidencia, Administracións Públicas e Xustiza, Alfonso Rueda, manifestouse disposto a redeseñar o mapa de emerxencias de Galicia pero "nunca desde o punto de partida de que todo o feito ata agora non vale para nada" porque, ao seu xuízo, "non é así, nin moitísimo menos".

Alfonso Rueda asegurou compartir algunhas das demandas expresadas por parte da Deputación e o Concello de Pontevedra tras o incendio que calcinou unha carpintería en Cerdedo-Cotobade no sentido de que a coordinación dos servizos de emerxencias pode ser mellorable.

Respecto diso, apuntou que a optimización dos servizos de emerxencias é un proceso permanente e que falar diso é sempre unha posibilidade que está encima da mesa. "A Xunta non se nega a facer a revisión do mapa de emerxencias pero tendo en conta que os recursos son os que son. Outra cousa é a distribución que fagamos deles", sinalou.

PUNTO DE PARTIDA

O vicepresidente da Xunta asegura non estar disposto a aceptar as declaracións catastrofistas nas que se di que o sistema de emerxencias galego é un desastre e que nada está atendido. "Iso sería inxusto fronte ao esforzo que están a facer as Administracións e os traballadores deses servizos", indicou.

Ademais, Rueda manifestouse disposto a sentar a dialogar pero adianta que "nunca imos aceptar que esa reestruturación teña que ser total". O vicepresidente engade que "claro que se pode avanzar e mellorar neste servizo" pero ao mesmo tempo habería que definir que outras cousas terán que deixar de ser prioritarias para derivar eses recursos a emerxencias.