"Axuste orzamentario" como escusa para non pagar a 50 sanitarios de Santiago

50 traballadores non cobraron o mes de xuño.

Está o Sergas "tan en bancarrota como para non dispoñer do diñeiro que precisa para pagar as nóminas do mes de xuño"? É a pregunta que se fai CIG-Saúde de Compostela ao denunciar que máis de 50 traballadores de atención primaria, na súa maioría en praza vacante desde o 16 de maio, non van cobrar o seu soldo ata finais de xullo.

Desde o sindicato mostran a súa indignación pola resposta dada a algún traballador por parte da Xestión Integrada de Santiago, que contestou que "non se pode pagar por axuste orzamentario".

A escusa cualifícana de "curiosa", tendo en conta que o propio Feijóo asegurou que a crise en Galcia quedaba atrás e que o persoal funcionario ía recuperar, na nómina do mes de xuño, as retribucións perdidas. Outra promesa que tachan de verdade a medias.

A CIG-Saúde asegura que "non existen razóns claras nin fundamentadas para que os ditos traballadores non cobren esa nómina" e esixen o seu inmediato pago.