Desde hai xa tempo, -é moi casino-, Puigdemont veu 'ameazando' co referendo, pactado ou non. Agora xa dispoñemos de máis datos. Esta semana, non se sabe o día, o President da Generalitat finalmente dirá a data e a pregunta. Faino para non perder credibilidade despois de tanto anuncio, porque a CUP está a apertar o seu e tamén polos acontecementos destes últimos días, onde un membro de CDC e deputado por Junst X Si foi imputado polo caso 3%. Un tema de longo percorrido porque a testemuña protexida que deu o nome de Gordó, como un dos actores directos nesa trama de presunto financiamento do seu partido, tamén implica a Artur Mas. Non é un tema menor para un partido que se atopa nunha situación moi complicada.
Non hai que esquecer que a carta enviada por Puigdemont á Comisión de Venecia para que apoiase a súa proposta, foi contestada cun "é necesario facer un referendo pactado co goberno central". Unha nova xarra de auga fría para as aspiracións 'independentistas' presidenciais.
Puigdemont atópase nunha encrucillada de difícil saída. Calquera camiño que tome vai ser criticado. Pero, un deles, o da marcha atrás da súa proposta, evitaría moitos problemas á cidadanía, entre eles o enfrontamento e o outro, a intervención da Generalitat.
Se decide dar ese paso atrás, desde o goberno de Mariano Rajoy teñen que facer un xesto para dar unha saída ao goberno da Generalitat. Cumprir as leis é obrigación de todos os gobernantes, pero tamén tender pontes de diálogos permanentes, 'O bo diálogo é aquel que esgota o tema sen esgotar os seus interlocutores', iso debería aprender Mariano Rajoy. O dialogo, o intercambio de opinións, a aceptación das diferenzas de criterio iso forma parte da democracia, a diversidade, e a pluralidade de ideas, pensamentos e sentimentos. Todo iso xoga un rol moi importante, porque nada é uniforme, nin de pensamento único. Aceptar estas premisas é un exercicio moi importante dos demócratas.
Esta é unha semana moi importante, se finalmente Puigdemont cumpre a súa palabra. O que vén a continuación das propostas do máximo responsable de Catalunya, está por ver. Non pasarán demasiados días para comprobar as reaccións políticas e xudiciais aos feitos. Non se albisca nada bo no horizonte, pero como a paciencia é unha virtude, só cabe esperar os sucesos dos próximos días, é dicir, esta semana será clave no proceso.
Orixinalmente publicado en Catalunyapress
Escribe o teu comentario