O atestado de Santiago indica que a policía cargou tras ser agredida "con botellas e petardos"

O atestado policial dos altercados que se produciron en Santiago o pasado mércores nunha manifestación posterior ao desaloxo de un local okupado como centro social indica que os policías recorreron ás cargas para protexer "a súa integridade" e a dos viandantes tras ser "golpeados" e recibir "o impacto de botellas e petardos".

O documento sinala que na concentración había unhas 500 persoas e que, sobre as 20,10 horas, un grupo "de 50 ou 60" coas caras "embozadas con carapuchas e pasamontañas, así como portando taboleiros de madeira" puxéronse "á cabeza" da mesma "acirrando e incitando aos demais" para que lles seguisen.

A continuación, relata como a concentración se tornou en manifestación e como axentes se puxeron á cabeza da mesma por orde do xefe do dispositivo.

Engade que, cando a manifestación percorría a Rúa do Preguntoiro, o grupo de "encapuchados" que estaba á cabeza, baixou "os paus" que portaban poñéndoos "á maneira de lanzas" e "cargaron directamente" contra os funcionarios situados diante.

Nese momento, agrega que "foron arroxados contra a forza actuante botellas e petardos, chegando a impactar algúns obxectos" contra os funcionarios.

Foi entón, segue o atestado, cando se procedeu a "iniciar unha intervención orgánica con defensa para protexer a vida e integridade física dos funcionarios actuantes, dado que eran golpeados e cravados cos paus".

DETENCIÓN E AGRESIÓN CUNHA ESTACA DE MADEIRA

O documento policial incide en que se pediron reforzos, tendo en conta que os "agresores" dos anteriores axentes continuaban lanzando "pedras, botellas, petardos e bengalas". Neste punto, procedeuse a unha nova intervención para "protexer a integridade física" dos policías, así como a "viandantes que se atopaban no lugar, alleos á manifestación".

Relata, a continuación, que un home "embozado con pasamontañas e carapucha" agride "cunha estaca de madeira" a un policía, chegando a "partirlla na cabeza".

Tras observar o sucedido co seu compañeiro, outro axente procede á detención do agresor, que "portaba nas súas mans a estaca de madeira partida en dous partes, cos que tentou agredir tamén a este funcionario".

Infórmano, subliña o atestado, de que se lle detén por "atestado e desorde público", así como dos dereitos que lle asisten de forma verbal. No cacheo incáutanselle "unha botella de vidro e dúas pedras do tipo usado nas liñas de ferrocarril".

"GUERRILLA URBANA"

Tras "disgregar" a manifestación, o atestado sinala que, en grupos máis pequenos, organizaron "unha guerrilla urbana nas rúas contiguas" á Praza de Cervantes. "Na mesma, axúdanse co envorcado de colectores e lanzamento de botellas de cristal contra os actuantes e pedras, así como o incendio de colectores", subliña.

Tamén fai constar que se pediu a presenza dos bombeiros para o sufoco dos focos incendiarios e que varios locais de hostalería tiveron que retirar cadeiras e mesas.

A orde quedou restablecida, continúa o documento, sobre as 21,30 horas e pediuse a presenza da Policía Científica para recoller imaxes e vídeos cos danos sobre o mobiliario urbano, entre outras cuestións. Seis axentes resultaron feridos.

PARTES MÉDICOS

O atestado incorpora os partes médicos dos axentes que resultaron feridos, atendidos no centro médico da Rosaleda, e que reflicten que sufriron, entre outras lesións, contusións nas mans, hematomas e unha otalxia tras exposición a son intenso.

A un deles inmobilizóuselle un dedo cunha férula de xeso.

O SUP PIDE QUE OS AXENTES SEXAN CONDECORADOS

Pola súa banda, o Sindicato Unificado de Policía (SUP) solicitou que os axentes que participaron no dispositivo do pasado martes en Santiago sexan condecorados polo "excelente traballo realizado" durante os disturbios rexistrados no Centro histórico da capital galega, onde "a pesar" de contar "cun número reducido de efectivos prestaron un excelente servizo á sociedade".

A través dun comunicado emitido este xoves, o SUP reclamou que os axentes da Policía Nacional que participaron no dispositivo "reciban unha recompensa" e que esta "leve a cabo na cidade onde ocorreron os feitos".

Deste xeito, o SUP defende que os axentes realizaron "unha intervención exemplar" nuns altercados que, segundo o sindicato, saldáronse con "un detido e seis policías feridos, dos cales, actualmente cinco permanecen de baixa laboral a consecuencia das lesións sufridas".