"Insubmisión" xeralizada ás reválidas de Primaria e ESO na primeira xornada

A Plataforma Galega en Defensa do Ensino Público cifrou este martes en máis dun 80% os alumnos convocados ás probas de avaliación de 6º de Primaria e 4º de ESO que non acudiron a realizalas.

Membros da plataforma concentráronse ante a Consellería de Cultura e Educación, en Santiago, para volver reclamar a derrogación da LOMCE e a eliminación destas probas, coincidindo coa primeira xornada das avaliacións de 6º de Primaria e 4º de ESO, que este ano se realizarán a modo de "mostraxe" nun 15% dos centros galegos.

Anxo Louzao, portavoz da plataforma, lembrou que as entidades sociais fixeron, como en anteriores ocasións, un "chamamento" ás familias para que "non envíen os seus fillos" a realizar estas probas, que "pretenden ser reválidas".

Louzao mostrouse satisfeito co resultado desta convocatoria, xa que, segundo as súas cifras provisionais, máis do 80% dos nenos convocados a estas probas non acudiron a realizalas e mesmo se deron casos de "centros nos que ningún neno se presentou ás probas".

O portavoz destacou que os "datos de insubmisión" superan os de anos anteriores, o que viu como unha "evidencia" de que a consellería actúa "de costas á comunidade escolar" e facendo "seguidismo das directrices de Madrid".

CAMBIO DE SISTEMA

Anxo Louzao lembrou que, no caso das probas de 6º e 4º de ESO, este ano "non teñen a gravidade que tiñan as anteriores", xa que, en lugar de ser para todos os nenos, realízanse nun 15 por cento de centros, a modo de "mostraxe".

Tras atribuír este cambio da Xunta á "mobilización constante contra as reválidas", Louzao criticou que, con todo, se realicen de forma "clandestina", xa que "non se fixeron públicos os centros nas cales ían facerse" e descoñécense cuestións como o tipo de centros ou se a mostraxe é "representativa".

"VER ISTO CON NORMALIDADE"

O conselleiro de Cultura, Román Rodríguez, instou este martes para asumir "con normalidade" as probas de avaliación da LOMCE e criticou os "posicionamentos extemporáneos" en contra.

Por iso, apuntou que "hai que empezar a ver isto con normalidade", do mesmo xeito que se fai "en moitos países de Europa" para ter "un diagnóstico" da situación educativa e implementar "medidas de mellora".

DIAGNÓSTICO DA SITUACIÓN

Román Rodríguez asegurou que as probas de avaliación da LOMCE buscan "mellorar" a educación a través dun "diagnóstico" da situación coa idea de "implementar medidas correctoras".

Con unha "metodoloxía moi semellante" ao informe PISA, estas probas posibilitaron, destacou o conselleiro, poñer en marcha "un importante número de contratos programa para cubrir as carencias que se detectan".