Caballero, sobre a vitoria "incontestable" de Sánchez: "Gañou e gañou ben"

O alcalde de Vigo e presidente da Federación Española de Municipios e Provincias (FEMP), Abel Caballero, recoñeceu este luns a "vitoria incontestable" de Pedro Sánchez nas primarias do PSOE e subliñou que "agora correspóndelle a el levar o temón do partido e marcar o rumbo do socialismo español".

O rexedor olívico, quen foi o principal valedor de Susana Díaz en Galicia, admitiu que creu "que ía gañar" a presidenta andaluza, a quen apoiou desde o convencemento de que "era a mellor opción para o partido". Con todo, constatou que Pedro Sánchez obtivo unha "gran vitoria" e "con todo o aval democrático dunhas eleccións primarias cun nivel de participación elevadísimo".

"Os que somos demócratas aceptamos, de bo grado ademais, a vitoria de Pedro. Gañou e gañou ben".

"PROTAGONISMO" PARA A NOVA DIRECCIÓN

"Agora empeza unha nova etapa, correspóndelle a Pedro Sánchez levar o temón do partido e marcar o rumbo do socialismo español. Aos gañadores correspóndelles falar, os demais non temos nada que dicir", resolveu, e sinalou que á nova dirección "correspóndelle o protagonismo, porque así llo deron lealmente os militantes".

Preguntado polos medios acerca de se o novo secretario xeral contará co seu apoio e lealdade, Abel Caballero afirmou que terá a colaboración "de todos os militantes, os 185.000", sen "ningunha dúbida". Na súa opinión, agora toca aos afiliados "empuxar o carro" e "apoiar ao PSOE" na dirección "que marque o novo secretario xeral" con "todo respecto e lealdade".

'TUIT' DO PP DE GALICIA

O rexedor olívico referiuse, por outra banda, e a preguntas dos xornalistas, a un comentario feito público na rede social Twitter por parte do PPdeG. No 'tuit', o PP galego referíase ao resultado das primarias socialistas facéndose eco dunha información sobre o triunfo de Sánchez na agrupación socialista de Vigo, precedida pola palabra 'Alcaldeeeee' (en alusión ao polémico 'tuit' dun xornalista deportivo cando se suspendeu o partido Celta-Madrid, e que foi 'retuiteado' por Alfonso Rueda).

Segundo Abel Caballero, o comentario do PPdeG en Twitter é "gravísimo" porque os populares "están a rirse outra vez, como xa fixo Rueda, do Celta e da cidade". "Nesta cidade vai ir de cinema ao PP, ríndose de Vigo", ironizou o alcalde.

SILVA: "EU NON ME ESCONDO"

A presidenta da Deputación de Pontevedra, a socialista Carmela Silva, recoñeceu este luns o "apoio moi relevante" obtido por Pedro Sánchez nas primarias do PSOE, e sinalou que o novo secretario xeral do partido "ten que tomar o temón e comezar a tomar decisións para recuperar a credibilidade da cidadanía".

Carmela Silva afirmou que, como persoa "profundamente democrática", debe recoñecer publicamente a vitoria de Pedro Sánchez, que "obtivo un apoio moi maioritario" da militancia. Con todo, precisou que, "como persoa de principios", sente "orgullosísima" de dar o seu respaldo a Susana Díaz nas primarias.

"É unha gran líder, unha muller con moita forza, convicción, profundamente socialista e fai unhas políticas en Andalucía que xa me gustaría a min que se fixesen en Galicia", proclamou, e engadiu: "Asumo o resultado con profundo respecto, pero co orgullo de apoiar a Susana Díaz. Eu non me escondo".

FEIJÓO: "ESPERO QUE Á TERCEIRA VAIA A VENCIDA"

Pola súa banda, o presidente da Xunta, Alberto Núñez Feijóo, felicitou ao novo secretario xeral do PSOE, Pedro Sánchez, pola súa vitoria nas primarias convocadas polo partido, aínda que lle lembrou que "75.000 votos nunhas eleccións son moi poucos votos".

Tras este resultado, dixo que espera que "aproveite o resultado" e exerza "unha política responsable e útil". "Espero que á terceira vaia a vencida", engadiu ao cuestionar o labor de Sánchez.

Así, insistiu en que a política do novo secretario xeral do PSOE non se caracterizou, no pasado, "pola responsabilidade". "Espero que faga unha política de reforzo dunha España que está a saír da crise económica".

"Porque, se non é así, o que ocorreu onte é que militantes do PSOE votaron por Pedro Sánchez pero nada máis", engadido lembrando que en España hai 47 millóns de cidadáns.

PUY CONSIDERA QUE LA VICTORIA DE SÁNCHEZ "NON É MALA PARA O PP"

O portavoz parlamentario do PPdeG, Pedro Puy, defendeu este luns que o feito de que Pedro Sánchez gañase as primarias socialistas "non é bo para España, pero non é malo para o PP", tendo en conta que o seu partido ten agora "a oportunidade de alargar a súa base electoral co electorado moderado de centro".

Non en balde, augurou o electorado moderado máis afín ao PSOE "probablemente senta máis orfo" doutro perfil de partido que o que, no canto de "apostar por unha vía socialdemócrata e europeísta", opta por circular "máis á esquerda" e mesmo nalgúns momentos "co populismo" para "competir con Podemos e as mareas de quenda".

"Hai liderados provinciais que saen claramente reforzados, pero outros non, como Vigo e, en boa medida, Ourense e Pontevedra", concretou.