O delegado do Goberno non cre que estean a cambiar os roles do narcotráfico en Galicia
Un dos españois detidos este luns polo cargamento de cocaína incautado en Ecuador está en prisión e o resto, en liberdade tras pasar a disposición xudicial.
A operación contra o narcotráfico na que este luns se incautou en Ecuador un cargamento de máis de 5 toneladas de cocaína continúa aberta. Un dos españois detidos está en prisión e o resto quedaron en liberdade tras pasar a disposición xudicial.
Así informou este martes o delegado do Goberno en Galicia, Santiago Villanueva, que non interpreta que estean a cambiar os roles do narcotráfico en Galicia. Villanueva asume que "hai un interese por introducir esta droga en Galicia, pero tamén pretendían entrar por Canarias". Por tanto, destacou que as últimas incautacións "impiden que 10.000 quilos de cocaína cheguen ao noso territorio e poidan ser distribuídos".
O delegado do Goberno felicita á Policía Nacional e o resto de corpos de seguridade nacionais e internacionais que participaron na operación. "Levan tempo traballando e culmina cando os investigadores deciden que é o momento adecuado para rebentar a operación", declarou.
Escribe o teu comentario