Bescansa: "A loita contra o machismo non é unha opción, senón unha obrigación"

Carolina Bescansa, Carmen Santos e Sofía Castañón participaron na mañá deste sábado na inauguarción dunhas xornadas organizadas por Podemos Galicia en Ames baixo o título 'Primavera Feminista'.

Na súa intervención, a deputada de Unidos Podemos reivindicou "o legado" de Rosalía de Castro como feminista ás portas da celebración do Día das Letras Galegas o 17 de maio, día no que se publicou en 1893 a súa obra 'Cantares galegos'.

Así, manifestou que a loita contra o machismo "non é unha opción" senón "unha obrigación de todas as persoas comprometidas cos dereitos humanos".

"O machismo é un atentado contra os dereitos humanos", expresou, para logo lembrar que "todos os días" as mulleres sofren "unha serie de macro e micro machismos" que "condicionan" as súas vidas.

Pola súa banda, Sofía Castañón indicou que "os debates sobre o feminismo" na sociedade deben ter continuidade e "enriquecerse" coa "posta en común" de experiencias entre mulleres.

Por último, Carmen Santos asegurou que este tipo de debates "son moi necesarios e favorecen á visibilización do modelo político igualitario que defende Podemos".

CHEGADA DO AVE

Bescansa instou ao presidente da Xunta, Alberto Núñez Feijóo, a centrarse no cumprimento dos prazos para a chegada do AVE a Galicia e non no que vota En Marea en Madrid.

Segundo recolle o partido morado nun comunicado, Bescansa declarou que lle resulta "curioso" que Feijóo critique o voto emitido pola senadora de En Marea Vanessa Angustia contra unha iniciativa para o impulso de varias infraestruturas para Galicia, entre elas, a chegada do AVE.

Para Bescansa, Feijóo "non pode vir pedir contas" logo dos atrasos no cumprimento dos prazos para a conexión da liña de alta velocidade entre Galicia e o centro peninsular.

Así, recoñeceu que Podemos reclama a finalización das obras, aínda que "o modelo de transporte" que defenden para Galicia "é diferente".