As bolsas de compra de Gadis achegan a literatura de Casares aos fogares galegos

|

Carloscasaresgadis

Supermercados Gadis vén de sumarse á celebración do Día das Letras a través dunha serie de accións culturais para conmemorar o ano de Casares. Nesta ocasión a empresa enfoca as súas accións nos nenos e pon en valor a literatura infantil e xuvenil galega da man de dous autores destacados: Carlos Casares e Helena Villar Janeiro. 


Pioneira no uso das bolsas da compra como 'vehículo cultural', desde primeiros de mes a compañia distribúe máis de dous millóns de bolsas cun fragmento da colección de ensaios 'Un País de Palabras', que achegará a obra de Casares aos fogares galegos. 


José Luís Fernández Astray, director de comunicación de GADISA, fixo fincapé no compromiso da compañía coa necesidade de promover iniciativas desta índole e puxo de relevo a figura de Casares: "sen dúbida un dos autores máis destacados da nosa literatura". 


Outra das accións que leva a cabo o supermercado será a distribución, ata fin de existencias, de 30.000 copias do libro de Contos do sol e da lúa, de Helena Villar Janeiro, a todos os seus clientes que realicen unha compra de calquera importe en supermercados Gadis de Galicia. O libriño irá acompañad dun marcapáxinas cun fragmento de A Galiña Azul, de Carlos Casares. 


Villar Janeiro valorou a que é xa a súa segunda colaboración con Gadis como moi positiva e subliñou sentirse "abrumada" polo número de exemplares "desorbitado" de Contos do sol e da lúa editados por Gadis. 


"Agradézolle a Gadis que, polo menos no Día das Letras Galegas, haxa un libro gratuíto en galego en moitos fogares nos que non entraría se tivese en prezo". Ademais, Janeiro describíu o libro de contos como "unha humilde homenaxe a Casares, unha persoa que se entregou á literatura infantil cando ninguén o facía". 


O fillo do autor homenaxeado, Hakan Casares, tildou a iniciativa de "extraordinaria" e resaltou que a través das bolsas da compra coa imaxe e o fragmento da literatura de Casares, "a cultura entrará nos fogares". 


"Que unha empresa cunha traxectoria como Gadis faga unha acción así é algo moi simbólico, xa que a literatura do meu pai poderá chegar a unha gran variedade de públicos". Ademais, fixo fincapé en que Casares buscou converterse nun autor popular "non para engrandecer o seu ego, senón para espallar a lingua e a cultura galegas". 


relacionada CLUN coloca a Carlos Casares nun millón de cartóns de leite Feiraco

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress
CLABE