A Baiona sáelle unha irmá no medio do Atlántico, Angra do Heroismo

Angra do Heroismo, nos Azores.

Baiona e Angra do Heroismo, capital da Illa Terceira dos Azores, comezaron esta semana o proceso para estudar o seu irmandamento. Os lazos culturais e históricos, coas rutas do descubrimento de América e o comercio coas Indias, así como os deportivos, grazas á regata oceánica que organizan os clubs náuticos, son as referencias nos primeiros pasos para estreitar as súas relacións institucionais.

O alcalde de Baiona, Ángel Rodal, mantivo no Monte Real Club de Iates unha primeira reunión co vicepresidente da Cámara de Angra do Heroismo, José Gaspar Rosa da Lima, na que tamén participaron o presidente do Angra Iate Clube, Augusto Silva, e o seu homólogo no club baionés, José Luis Álvarez.

Ademais, estiveron presentes para avanzar no irmandamento, tal e como indicou o Consistorio nun comunicado, os concelleiros María Iglesias, Beatriz González e Raúl Costas, edís de Cultura, Turismo e Actividades Marítimas, respectivamente.

Este primeiro contacto foi "moi positivo" para chegar a un irmandamento e estreitar as relacións, que xa son históricas pero que nos últimos anos reforzáronse coa organización da regata, tal e como apuntou Ángel Rodal.

O acordo entre os representantes de Baiona e Angra deberá agora plasmarse nos informes que serán presentados ante o Goberno de España para que autorice a firma. Posteriormente, os plenos municipais de cada localidade deberán dar o visto e prace definitivo ao irmandamento.