Díaz pide un PSOE unido na Coruña e Ferrol: "Quero ser a secretaria xeral de todos"

A precandidata ás primarias do PSOE e presidenta da Junta de Andalucía, Susana Díaz, manifestou este venres nun mitin na Coruña que quere que o seu partido, canto antes, "deixe de lamentarse, se erga e volva levantar a España", e, sobre todo, que ninguén o "cohiba", nin a dereita de Mariano Rajoy nin o líder de Podemos, Pablo Iglesias. "Sexamos rebeldes e demos a España un partido socialista reconocible", pediu aos seus compañeiros.

Expresou que quere ser a primeira muller que chega á Secretaría Xeral do PSOE e que gaña as eleccións en España e responder así á confianza, a ilusión e a esperanza que miles de compañeiros depositaron nela, entre os que se atopan moitos socialistas "veteranos".

Susana Díaz defendeu que a súa candidatura é "colectiva", de todas as xeracións, de todos os territorios, de todas as linguas e acentos e de todas as sensibilidades, porque quere ser a secretaria xeral de todos os socialistas, sen ningún tipo de "exclusión" nin de diferenza. "Quero que todos sentan parte dun proxecto común, que é o que representamos", sentenciou.

"Imos falar ben do PSOE e dos compañeiros que o forman, apoien a quen apoien, avalen a quen avalen ou pensen como pensen", sinalou. "Quero ser a secretaria xeral de todos e o primeiro que vos pido é que imos reforzar a fraternidade", apuntou Díaz, recalcando que só cun PSOE forte, sen ningún complexo, cámbiase a vida da xente.

Tamén en Ferrol, a súa primeira parada en territorio galego, onde estará ao longo deste sábado, incidiu nesta idea da fraternidade e a unión entre socialistas, nun momento de fonda división interna. Durante unha visita ao monólito dedicado ao fundador do PSOE, Pablo Iglesias, fixo fincapé en que traballará ata o límite das súas posibilidades para reforzar a "fraternidade" entre os socialistas.

Durante a súa visita ao monólito dedicado ao fundador do PSOE na cidade, onde depositou un ramo de flores, Susana Díaz, que curiosamente tamén naceu un 18 de outubro, indicou que, sen dúbida, estar na "casa" de Iglesias será un momento "entrañable e único" ao longo desta campaña das primarias, que serve para reafirmala aínda máis na honra que é para ela aspirar a ser a primeira muller secretaria xeral dun partido con 140 anos de historia.

"Son a filla dun fontaneiro e dunha ama de casa e teño a honra de ser a primeira muller que aspiro á Secretaría xeral do PSOE", volveu repetir. 

Indicou que ela desexa que o PSOE volva gañar en España porque é a mellor maneira de cambiar a vida á xente, porque este partido defende como ninguén a igualdade de oportunidades. "Este é o partido da esquerda útil", sinalou Díaz, para quen o PSOE se ten que mostrar como é e non necesita "disfrazarse de nada", porque ten unha folla de servizos chea de logros para este país.