2.000 asentos máis esta ponte nos trens con orixe ou destino Galicia

Renfe programou un dispositivo de reforzo para facilitar a mobilidade durante a ponte do 1 de maio con 2.000 prazas adicionais nos trens de longa distancia con orixe ou destino Galicia.

Segundo informou a compañía, a operación iníciase este venres cunha "oferta reforzada" nos trens Alvia e no servizo Intercity Vigo/A Coruña ata Bilbao/Hendaia, con orixe e destino Galicia.

Deste xeito, chegará a ofrecer 2.000 prazas adicionais sobre a oferta global desde este venres ata o 3 de maio, segundo concretou Renfe.

A compañía ten previsto máis de 1,3 millóns de prazas nos seus trens AVE, longa distancia, Avant e media distancia convencional para viaxar en tren durante a ponte de maio co fin de "atender o aumento da demanda", sobre todo entre Madrid e Andalucía, en todo o Corredor Mediterráneo e entre Cataluña e a comunidade andaluza, segundo concreta.